នៅថ្ងៃទី ១៦ ខែមិថុនា ឆ្នាំ ២០២៥ នេះ ប្រមុខការពារជាតិកម្ពុជា ឯកឧត្តម ឧបនាយករដ្ឋមន្ត្រី ទៀ សីហា បានឆ្លើយតបការចោទប្រកាន់ពីភាគីយោធាថៃដែលអះអាងថា កងទ័ពកម្ពុជាបានបង្វែរកាណុងកាំភ្លើងទៅទិសភូមិដ្ឋាន និង បន្ទាយរបស់កងទ័ពថៃ។
ឯកឧត្តមឧបនាយករដ្ឋមន្ត្រី បានបញ្ជាក់ថា ៖ «នេះជាយុទ្ធវិធីការពារជាតិរបស់កម្ពុជា។ ពេលយើងបំពាក់សព្វាវុធ គឺដើម្បីការពារបូរណភាពទឹកដី។ ច្បាស់ណាស់ គោលដៅគឺទម្រង់ទៅខ្មាំងសត្រូវ មិនដែលមានក្បួនទ័ពណាដែលបង្វែរកាណុងមកផ្ទះខ្លួនឯងនោះទេ»។ ឯកឧត្តមបន្តជាសំណួរថា ៖ «ឬមួយកងទ័ពថៃ រៀនយុទ្ធវិធីខុសពីកម្ពុជា?»។
ឯកឧត្តមឧបនាយករដ្ឋមន្ត្រីបានរំឭកផងដែរថា ជម្រើសសន្តិវិធីគឺត្រូវផ្អែកលើការចរចារវាងរដ្ឋាភិបាលទាំងពីរ ទាំងផ្នែកនយោបាយ សេដ្ឋកិច្ច និង វិស័យផ្សេងៗ។ ចំពោះផ្នែកយោធា គឺជាជម្រើសចុងក្រោយបំផុតតែប៉ុណ្ណោះ។ ឯកឧត្តមបន្ថែមថា ៖ «យើងត្រៀមខ្លួនរួចជាស្រេចសម្រាប់ការការពារទឹកដីកម្ពុជា ដោយគ្មានមហិច្ឆតាឈ្លានពានទៅប្រទេសជិតខាងឡើយ»៕
ប្រភព ៖ នាយកដ្ឋានព័ត៌មាន
