កាលពីថ្ងៃទី ១១ ខែកញ្ញា ឆ្នាំ ២០២៥ កន្លងទៅនេះ សារព័ត៌មានថៃបានឱ្យដឹងថា សំណាក់ទីសក្ការៈល្បីលោកម្ចាស់ផាយ៉ាវ៉ាំង នៅខេត្តឡាំប៉ាង ប្រទេសថៃ ត្រូវបានដើមឈើធំរលំសង្កត់ បណ្តាលឱ្យខូចខាតអស់យ៉ាងច្រើន។
តាមព័ត៌មានបានឱ្យដឹងថា អាស្រមទីសក្ការៈមួយនេះ ស្ថិតនៅក្នុងស្រុកវ៉ាំងនឿ ខេត្តឡាំប៉ាង ជាទីដែលប្រជាជននៅក្នុងស្រុកគោរពបូជាទៅដល់លោកម្ចាស់ផាយ៉ាវ៉ាំង ដែលជាម្ចាស់ស្រុកម្ចាស់ទឹកដី។ ក្នុងនោះ អាស្រមនេះត្រូវបានដើមឈើមួយដើមធំនៅក្បែរនោះរលំសង្កត់ទៅលើ បណ្តាលឱ្យខូចខាតសឹងតែទាំងអស់ ជាពិសេសគឺធ្វើឱ្យអ្នកស្រុកនាំគ្នាភ័យព្រួយខ្លាចថាមានហេតុភេទមិនល្អណាមួយកើតឡើង។
យ៉ាងណាមិញ រូបសំណាករបស់លោកម្ចាស់ផាយ៉ាវ៉ាំង មិនមានការខូចខាតនោះទេ ហើយក៏ត្រូវបានគេយកទៅរក្សាទុកនៅវត្តបានម៉ៃសិន រង់ចាំជួសជុលអាស្រមឱ្យហើយស្រេចរួចរាល់ ទើបយករូបសំណាកនេះត្រឡប់មកវិញ៕
ប្រភព៖ Khaosod
