ផ្ទុះវែកញែកមួយរយៈ ពេលនេះ ថៃ អតិជាតិបុត្រ បង្ហាញរូបសម្រស់ថ្មីតែងខ្លួនស្អាតភ្លឹងៗ សង្ហាៗដូចពីមុនវិញ

ពិតណាស់ ក្រោយពីស្ងប់ស្ងាត់បាត់មុខលើវិថីសិល្បៈមួយរយៈធំ ស្រាប់តែថ្មីៗកន្លងទៅនេះ ថៃ អតិជាតិបុត្រ បានធ្វើឱ្យមហាជនអ្នកគាំទ្រលើបណ្ដាញសង្គមផ្ទុះការចាប់អារម្មណ៍ភ្ញាក់ផ្អើល និង ចែករំលែកតៗគ្នានូវវីដេអូសកម្មភាពមួយរបស់លោក ខណៈបានឃើញសភាពរបស់តារាវ័យក្មេងរូបនេះ ហាក់ប្រែជាស្គមស្រក់គីឡូប្លែកខ្លាំងខុសពីមុន ដែលធ្លាប់ជាតារាចម្រៀងវ័យក្មេងស្រស់សង្ហា ទៅណាមកណាតែងខ្លួនខ្ញង់ៗ មានតែនារីៗតាមសម្លឹងមើល។

ស្របពេលមហាជនអ្នកលេងបណ្ដាញសង្គមផ្ទុះការចាប់អារម្មណ៍វែកញែកខ្លាំងលើរូបលោក ស្រាប់តែ ថៃ អតិជាតិបុត្រ ចេញមុខបង្ហោះសារលើហ្វេសប៊ុកជាបន្តបន្ទាប់ ដោយក្នុងនោះលោកក៏បានប្រកាសពីការវិលត្រឡប់លើវិស័យចម្រៀងជាថ្មី និង ត្រៀមបញ្ចេញបទចម្រៀងថ្មីស្នាដៃនិពន្ធរបស់ខ្លួន បែប Hip Hop Rap ទៀតផង។

លើសពីនេះ ក្រោយពីប្រកាសវិលត្រឡប់ចូលសិល្បៈ និង ចេញស្នាដៃចម្រៀងថ្មីៗវិញ គេក៏សង្កេតឃើញថាតារាចម្រៀងវ័យក្មេងរូបនេះ ក៏ចាប់ផ្ដើមបង្ហាញសកម្មភាពថ្មីៗ តុបតែងខ្លួនស្អាតភ្លឹងៗធ្វើការផ្សព្វផ្សាយផលិតផលផ្សេងៗនៅតែសង្ហាដូចពីមុនដដែល ដោយកំពុងទទួលបានការចាប់អារម្មណ៍សរសើរជាថ្មីពីរូបសម្រស់របស់លោក៕