ធនាគារ វីង បានបង្កើតបរិយាកាសកន្លែងការងារមួយដែលបុគ្គលិកអាចរីកចម្រើន ទទួលការផ្តល់តម្លៃ ហើយអាចប្រើប្រាស់សមត្ថភាពដែលខ្លួនមាន ដើម្បីជាប្រយោជន៍ដល់សង្គម។
ដោយអនុវត្តយ៉ាងខ្ជាប់ខ្ជួននូវគោលការណ៍ “បុគ្គលិកជាអាទិភាព” ធនាគារ វីង (ខេមបូឌា) ម.ក បានទទួលពានរង្វាន់ “និយោជកឆ្នើមនៅតំបន់អាស៊ីប្រចាំឆ្នាំ២០២៥” ពីស្ថាប័ន Employer Branding Institute ដែលមានមូលដ្ឋាននៅប្រទេសឥណ្ឌា។ ពានរង្វាន់កិត្តិយសនេះត្រូវបានប្រគល់ជូននៅក្នុងកម្មវិធីនៃការប្រគល់ពានរង្វាន់ម៉ាកយីហោនិយោជកឆ្នើមនៅក្នុងតំបន់អាស៊ីលើកទី២០ រៀបចំឡើងនៅក្នុងប្រទេសសិង្ហបុរី ហើយនេះជាការទទួលស្គាល់ដ៏មានកិត្យានុភាពជាលើកទី៥ របស់ធនាគារ វីង ផងដែរ។
លោក ឡៅ សៀងហៃ នាយកគ្រប់គ្រងធនធានមនុស្ស និង វប្បធម៍ការងារ នៃក្រុមហ៊ុន រ៉ូយាល់ គ្រុប បានលើកឡើងថា៖ “នៅធនាគារ វីង យើងជឿជាក់ថា នៅពេលយើងយកចិត្តទុកដាក់ និងផ្តល់តម្លៃទៅដល់បុគ្គលិក ពួកគាត់នឹងខិតខំបំពេញការងារបានយ៉ាងល្អ។ បុគ្គលិកមិនគ្រាន់តែជាផ្នែកមួយនៃសមាជិកស្ថាប័នរបស់យើងប៉ុណ្ណោះទេ តែជាគ្រឹះនៃភាពជោគជ័យរបស់យើងផងដែរ។ យើងតែងតែខិតខំបង្កើតបរិយាកាសការងារមួយ ដែលគ្រប់គ្នាមានអារម្មណ៍ថាសុវត្ថិភាព ទទួលបានការគាំទ្រ និងជំរុញទឹកចិត្តឱ្យរីកចម្រើន។ ហើយយើងចង់ឱ្យបុគ្គលិក វីង គ្រប់រូបដឹងថាពួកគេម្នាក់ៗដើរតួយ៉ាងសំខាន់សម្រាប់ភាពជោគជ័យរបស់យើង។”
ពានរង្វាន់នេះត្រូវបានទទួលស្គាល់ ស្របពេលដែលធនាគារ វីង មានកំណើនគួរឱ្យកត់សម្គាល់។ បច្ចុប្បន្នធនាគារ វីង បានពង្រីកវត្តមានសាខារបស់ខ្លួននៅទូទាំងប្រទេសកម្ពុជាជិត ៣០ ទីតាំង។ ការពង្រីកខ្លួនឥតឈប់ឈរនេះមិនត្រឹមតែបានធ្វើឱ្យប្រសើរឡើងនូវលទ្ធភាពទទួលបានសេវាហិរញ្ញវត្ថុប៉ុណ្ណោះទេ ប៉ុន្តែក៏បានរួមចំណែកបង្កើតឱកាសការងារដល់ប្រជាជនកម្ពុជាផងដែរ។ ជាក់ស្តែង បុគ្គលិកធនាគារ វីង បានកើនឡើង ៥០% ពីឆ្នាំ២០២៤ ដល់ពាក់កណ្តាលឆ្នាំ២០២៥ ហើយក្នុងនោះបុគ្គលិកស្ត្រីមានជិត ៣៥%។
ដើម្បីគាំទ្រកំណើននេះ ធនាគារ វីង បានវិនិយោគយ៉ាងច្រើនសន្ធឹកសន្ធាប់ក្នុងការអភិវឌ្ឍសមត្ថភាពបុគ្គលិក។ រយៈពេលត្រឹមតែ ៦ខែ ក្នុងឆ្នាំ២០២៥នេះ ធនាគារ វីង បានរៀបចំកម្មវិធីបណ្តុះបណ្តាលចំនួន ២៨២វគ្គ ដែលមានរយៈពេលសរុប ៤.៥២៣ ម៉ោង។ កម្មវិធីទាំងនេះផ្តោតលើការបណ្តុះបណ្តាលភាពជាអ្នកដឹកនាំ ជំនាញឌីជីថល ចំណេះដឹងអំពីផលិតផល និងជំនាញប្រាស្រ័យទំនាក់ទំនង និងការដឹកនាំជីវិត ដែលចំណេះ និងជំនាញទាំងនេះអាចធានាបានថាបុគ្គលិកមានសមត្ថភាពគ្រប់គ្រាន់ដើម្បីបម្រើសេវាអតិថិជន និងអាចរីកចម្រើនក្នុងអាជីពរបស់ពួកគេ។
គោលការណ៍ផ្ដល់តម្លៃឱ្យបុគ្គលិក (EVP) នៅធនាគារ វីង ផ្តោតលើសសរស្តម្ភមួយចំនួនដូចជា៖ យកចិត្តទុកដាក់, អភិវឌ្ឍន៍, បង្កើតផលវិជ្ជមាន, និងការផ្តល់រង្វាន់។ ហើយសសរស្តម្ភទាំងនេះស្របជាមួយនឹងគុណតម្លៃស្នូលរបស់ធនាគារ វីង ដោយផ្តោតលើ “ជ័យជម្នះ”, “ច្នៃប្រឌិត”, “បង្រៀន ឬណែនាំ”, “រីកចម្រើន”, “ល្អឥតខ្ចោះ” និង “ការគោរព”។ ហើយសសរស្តម្ភទាំងនេះបង្កើតជាគ្រឹះដ៏រឹងមាំសម្រាប់កន្លែងការងារមួយដែលបុគ្គលិកទាំងអស់មានអារម្មណ៍ថាទទួលបានការជំរុញទឹកចិត្ត ទទួលស្គាល់ការខិតខំ និងការគាំទ្រ។
ធនាគារ វីង ក៏សម្រេចបាននូវជំហានដ៏សំខាន់ក្នុងការលើកកម្ពស់សមធម៌នៅកន្លែងធ្វើការផងដែរ។ តាមរយៈភាពជាដៃគូជាមួយអង្គការ Good Return ធនាគារ វីង បានរៀបចំផែនការសកម្មភាពយេនឌ័រ និងបានដាក់ចេញនូវគោលនយោបាយការពារកុមារ និងការទប់ស្កាត់ការកេងប្រវ័ញ្ច ការរំលោភបំពាន និងការបៀតបៀនផ្លូវភេទជាដើម។ បុគ្គលិកត្រូវបានបណ្តុះបណ្តាលលើការអនុវត្តដែលគិតគូរពីយេនឌ័រ ដើម្បីជំរុញវប្បធម៌នៃការគោរព និងការលើកកម្ពស់បរិយាបន្ន។
នៅគ្រប់ការិយាល័យរបស់ធនាគារ វីង មិនថានៅរាជធានីភ្នំពេញ និងតាមបណ្តាខេត្ត បុគ្គលិកអាចប្រើប្រាស់កន្លែងទទួលទានអាហារ និងបន្ទប់សម្រាកដែលបានរចនាយ៉ាងយកចិត្តទុកដាក់។ កន្លែងទាំងនេះផ្តល់នូវបរិយាកាសផាសុកភាពសម្រាប់បុគ្គលិកក្នុងការសម្រាកអំឡុងពេលអាហារថ្ងៃត្រង់ ដើម្បីបង្កើនថាមពេលឡើងវិញ ដែលនេះបង្ហាញពីការប្តេជ្ញាចិត្តរបស់ធនាគារ វីង ចំពោះការគាំទ្រតុល្យភាពនៅកន្លែងធ្វើការ។
កាលពីខែមេសា ឆ្នាំ២០២៥ ធនាគារ វីង បានបើកដំណើរការមជ្ឈមណ្ឌលហាត់ប្រាណដ៏ទំនើបមួយនៅទីស្នាក់ការកណ្តាលរបស់ខ្លួន ដោយផ្តល់ជូនបុគ្គលិកនូវការប្រើប្រាស់ឧបករណ៍ហាត់ប្រាណគុណភាពខ្ពស់ និងទីធ្លាសម្រាប់លើកកម្ពស់សុខុមាលភាព ដោយឥតគិតថ្លៃ។ មជ្ឈមណ្ឌលហាត់ប្រាណនេះ ត្រូវបានរៀបចំឡើងយ៉ាងយកចិត្តទុកដាក់ដើម្បីលើកកម្ពស់សុខភាពផ្លូវកាយ និងសុខភាពផ្លូវចិត្ត ដែលឆ្លុះបញ្ចាំងពីការប្តេជ្ញាចិត្តយ៉ាងមោះមុតរបស់ធនាគារ វីង ក្នុងការជួយឱ្យបុគ្គលិករបស់ខ្លួនមានអារម្មណ៍ល្អបំផុតទាំងនៅកន្លែងធ្វើការ និងការជីវិតរស់នៅប្រចាំថ្ងៃ។
ក្រៅពីកន្លែងការងារនោះ វប្បធម៌នៃការយកចិត្តទុកដាក់របស់ធនាគារ វីង ក៏បានពង្រីកទៅក្នុងសហគមន៍ផងដែរ។ បុគ្គលិកបានចូលរួមក្នុងការបរិច្ចាគឈាម ការដាំដើមឈើ និងការរៃអង្គាសថវិកាសម្រាប់មន្ទីរពេទ្យកុមារអង្គរជាដើម។ គំនិតផ្តួចផ្តើមមួយដ៏មានឥទ្ធិពលបំផុតរបស់ធនាគារ វីង គឺកម្មវិធីអភិវឌ្ឍន៍បុគ្គលិកកម្មសិក្សា ដែលជាកម្មវិធីពន្លឿនអាជីពសម្រាប់យុវជនកម្ពុជាដែលខ្វះខាតលទ្ធភាពផ្នែកហិរញ្ញវត្ថុដើម្បីបន្តការសិក្សាថ្នាក់ឧត្តមសិក្សា។ កម្មវិធីនេះផ្តល់ជូនប្រាក់ឧបត្ថម្ភប្រចាំខែ ការធានារ៉ាប់រង កន្លែងស្នាក់នៅ និងការបណ្តុះបណ្តាលដែលមានរចនាសម្ព័ន្ធច្បាស់លាស់។ ចាប់តាំងពីការចាប់ផ្តើមក្នុងឆ្នាំ២០២៤ មានកម្មសិក្សាការីចំនួន ៥៦ នាក់បានបញ្ចប់កម្មវិធី ហើយក្នុងនោះ ៣៩ នាក់បានចូលបម្រើការងារពេញម៉ោងនៅធនាគារ វីង ដែលនេះជាសក្ខីភាពបញ្ជាក់ពីការប្តេជ្ញាចិត្តរបស់ធនាគារ វីង ចំពោះកំណើនប្រកបដោយបរិយាបន្ននៅក្នុងសហគមន៍។
ការទទួលបានពានរង្វាន់ និយោជកឆ្នើមនៅតំបន់អាស៊ី ជាលើកទី៥ របស់ធនាគារ វីង គឺលើសពីសមិទ្ធផលមួយ ព្រោះថានេះការអបអរសាទរចំពោះភាពជាអ្នកដឹកនាំដែលជំរុញដោយចក្ខុវិស័យច្បាស់លាស់ កំណើនបរិយាបន្ន ហើយក៏ជាទឡ្ហីករណ៍ដែលថាការកសាងធនធានឱ្យរឹងមាំ នឹងជួយសម្រេចសមិទ្ធផលដ៏អស្ចារ្យដោយរលូន៕
