កន្លងមក មហាជននិយមតាមដានពីជីវិតឯកជនរបស់ក្រុមគ្រួសារតារាស្រី គង់ ចាន់ស្រីមុំ និង ស្វាមី គឺលោក គឹម សីហា ច្បាស់ជាបានជ្រាបហើយថា ប្តីប្រពន្ធមួយគូនេះ ចូលចិត្តធ្វើបុណ្យសន្សំកុសលផងដែរ ដោយជារឿយៗអ្នកទាំងពីរតែងចែកទានជូនអ្នកក្រីក្រ និង ជូនជាបច្ច័យទៅកាន់វត្តអារាមនានាទៀតផង។
ជាក់ស្តែង ថ្មីៗនេះ បន្ទាប់ពីមមាញឹកក្នុងការរកស៊ីមួយរយៈធំហើយនោះ អ្នកនាង គង់ ចាន់ស្រីមុំ និង លោក គឹម សីហា បានយកពេលទៅសន្សំធម៌ជាថ្មី ដោយអ្នកទាំង ២ បាន ចំណាយពេល ១០ ថ្ងៃ ដើម្បីចូលរួមកម្មសិក្សាវិបស្សនាកម្មដ្ឋាន។
ក្នុងនោះ ក្រោយពីចូលរួមកម្មសិក្សាវិបស្សនាកម្មដ្ឋាន អ្នកនាង គង់ ចាន់ស្រីមុំ បានបង្ហោះសារចែករំលែកបុណ្យ និង បទពិសោធរបស់ខ្លួនលើបណ្តាញសង្គមហ្វេសប៊ុកថា៖ «សូមជូនបុណ្យ ដល់បងប្អូនទាំងអស់គ្នាផង។ ក្រោយពីនាងខ្ញុំ និង ស្វាមី បានចូលរួមកម្មសិក្សា វិបស្សនាកម្មដ្ឋាន អស់រយៈពេល ១០ ថ្ងៃមកនេះ ដោយមានវិន័យ និង ការអត់ធ្មត់ ខ្ញុំកាន់តែបានទទួលនូវសេចក្តីសុខ សេចក្តីស្ងប់ស្ងាត់ និង ការយល់ដឹងថ្មីក្នុងចិត្តបន្ថែម។
ការអនុវត្តរយៈពេល ១០ ថ្ងៃនេះ បានបង្រៀនឱ្យខ្ញុំដឹងពីតម្លៃនៃការស្ងប់ស្ងាត់ ការបើកចិត្ត និង ការរស់នៅក្នុងពេលបច្ចុប្បន្ន ដោយការទទួលយកនូវសេចក្តីពិតក្នុងជីវិត។ ក្រោយការប្រេីរយៈពេល ១០ ថ្ងៃមកនេះ នាងខ្ញុំ និង ស្វាមី សូមជូនកុសលបុណ្យនេះ ចែកចាយដល់បងប្អូនទាំងអស់គ្នាឱ្យបានជួបតែសេចក្តីសុខ សុភមង្គល និង សេចក្តីរុងរឿងគ្រប់ប្រការ។
ខ្ញុំសូមឱ្យសីល និង សទ្ធាជ្រះថ្លាប្រកបដោយធម៌នេះ ជួយឱ្យខ្ញុំរួចរំដោះនៃភាពទុក្ខទាំងឡាយ លោភៈ ទោសៈ មោហៈ និង ចែករំលែកកុសលផលបុណ្យ ដែលខ្ញុំបានសាង បានដល់ឱ្យអ្នកជុំវិញខ្លួន និង សព្វសត្វទាំងឡាយ ទទួលយកចំណែកនៃកុសលផលបុណ្យព្រះធម៌របស់ខ្ញុំ ឱ្យបានក្រេបជញ្ជក់នូវសេចក្តីសុខសន្តិភាពពិតប្រាកដ សុខដុមរមនាពិតប្រាកដ សុភមង្គលពិតប្រាកដ សេចក្តីរំដោះខ្លួនចេញពីទុក្ខទាំងអស់ មានសេចក្តីមេត្តា ដោយបរិបូរណ៍»៕
