ត្រលប់ទៅជាងដប់ឆ្នាំមុន ក្មេងស្រីអាយុ ១៣ ឆ្នាំ ម្នាក់ឈ្មោះ Roshin Ali នាងបានរត់ចេញពីផ្ទះ ដោយសារតែខ្លាចឪពុកសម្លាប់។ ឪពុករបស់នាងជាមនុស្សតឹងរ៉ឹង មិនអនុញ្ញាតឱ្យកូនណាមួយដើរលេងក្រៅផ្ទះឡើយ។ ថ្ងៃមួយឪពុកនាងបានបាត់លុយអស់ពីខ្លួន កើតអារម្មណ៍ខឹងក្រោធ លុះមកដល់ផ្ទះ ក៏ចាប់បានកូនចេញក្រៅទៀត ចាប់ផ្តើមឆេវឆាវ រហូតចង់សម្លាប់កូនខ្លួនឯងទាំងអស់។
គ្រានោះ Roshin Ali រួមជាមួយបងស្រី និង ប្អូនប្រុស បាននាំគ្នារត់ទៅពួនក្នុងបន្ទប់គេង ដោយសារខ្លាចឪពុកធ្វើបាប។ បងស្រីរបស់នាងបានឈរខ្ទប់ទ្វារដើម្បីកុំឱ្យឪពុកចូលរួច។ តែទប់យ៉ាងណា ក៏ទប់មិនជាប់ ឪពុកនាងបានឱ្យប្រពន្ធទៅយកកាំបិតមកគាស់ទ្វារ។ ពេលបើកទ្វារបាន ឪពុកបានចាប់ក្របួចសក់បងស្រីនាង ហើយអូសទៅបន្ទប់គាត់ រួចប្រើខ្សែកាបវាយដំ។ បងស្រីនាងត្រូវបានចងដៃ ចងជើង និង យកក្រណាត់មកញ៉ុកមាត់មិនឱ្យស្រែក។ តែយ៉ាងណា នាងនៅតែឮសំឡេងបងស្រីនាង សុំអង្វរឪពុកកុំឱ្យសម្លាប់។
បន្ទាប់ពីវាយដំបងស្រី ម្តាយរបស់នាងបានដើរមកមើលនាង និង ប្អូនប្រុស ហើយនិយាយថា «ដល់វេនពួកឯងហើយ»។ ភ្លាមៗនោះ នាង និង ប្អូនប្រុសបាននាំគ្នាលោតតាមបង្អួច រត់គេចខ្លួនទៅសួនច្បារក្បែរផ្ទះ។ មិនយូរប៉ុន្មាន ឪពុកនាងបានទូរស័ព្ទហៅប៉ូលិសឱ្យស្វែងរក។ ខាងប៉ុស្តិ៍បានចាត់ឱ្យប៉ូលិសម្នាក់ឈ្មោះ Tyler Schrupp ជាអ្នកស្វែងរក ហើយរយៈពេលត្រឹមតែមួយថ្ងៃ Roshin Ali និង ប្អូនប្រុសត្រូវបានរកឃើញ។
ក្រោយការសួរនាំដឹងដើមហេតុ Roshin Ali និង បងប្អូនរបស់នាង ត្រូវបានយកទៅមើលថែ រីឯឪពុកម្តាយរបស់នាង ត្រូវជាប់គុកតែប៉ុន្មានថ្ងៃប៉ុណ្ណោះ។
ហាក់ដូចជានិស្ស័យ ១២ ឆ្នាំក្រោយមក Roshin Ali នាងបានធំពេញវ័យ និង បានចូលបម្រើការនៅនាយកដ្ឋានតម្រួត ជាកន្លែងដែលប៉ូលិសឈ្មោះ Tyler Schrupp កំពុងធ្វើការ។ ជួបគ្នាជាថ្មី តែប៉ូលិសរូបនេះ មិនចាំមុខ និង មិនស្គាល់ Roshin Ali ជានរណាឡើយ។ ដោយឃើញ Roshin Ali ស្រស់ស្អាតខ្លាំង លោកបានចាប់ចិត្តលើនាងភ្លាមៗ។
មកដល់ថ្ងៃមួយ អ្នកទាំងពីរមានឱកាសបាននិយាយគ្នា។ ពេលសាងសងកាន់តែស៊ីជម្រៅ អ្នកទាំងពីរបានរម្លឹកពីរឿងរ៉ាវចាស់ៗ រួចមកទើបដឹងថា អ្នកទាំងពីរធ្លាប់ពាក់ព័ន្ធគ្នានឹងរឿងបាត់ខ្លួនពីមុន។ ពេលដឹងសាច់រឿង អ្នកទាំងពីរចាប់ផ្តើមមានចិត្តលើគ្នាតែម្តង។
ទីបំផុត ក្មេងស្រីបាត់ខ្លួន និង ប៉ូលិស ដែលជាអ្នកតាមរក បានជួបគ្នាជាថ្មី។ អ្នកទាំងពីរបានភ្ជាប់ពាក្យកាលពីខែសីហា ឆ្នាំ ២០២៤ បច្ចុប្បន្នមានកូនប្រុសម្នាក់អាយុ ៥ ខែ។ អ្នកទាំងពីរមានគម្រោងរៀបការនៅឆ្នាំក្រោយ៕
ប្រភព៖ NYP
