មហាជនអ្នកគាំទ្រផលិតកម្មបារមី ច្បាស់ជាបានឃើញមកហើយនូវសកម្មភាពនានារបស់ សិល្បករ សិល្បការិនីក្នុងទ្រនំនេះ ដែលបានចេញមកបញ្ចេញសំឡេងតាមរយៈរូបភាពផ្សេងៗ ដើម្បីបង្ហាញពីការពិត និង យុត្តិធម៌ដល់កម្ពុជាពីការឈ្លានពានរបស់ប្រទេសថៃ។ ក្នុងនោះដែរ ទាំងលោក វណ្ណដា, លោក វណ្ណថាន, លោក នរិទ្ធ, លោក យូហៃ និង កញ្ញា រ៉េត ស៊ូហ្សាណា បានចេញមកបញ្ចេញសំឡេងតាមរយៈ ការបង្ហោះសារ ការបង្ហាញតាមតន្រ្តី និង ចម្រៀងជាដើម។
ងាកទៅកាន់កញ្ញា ឡរ៉ា ម៉ម CEO របស់ផលិតកម្មបារមីឯណោះវិញ ក្រោយខកខានបញ្ចេញចម្រៀងផ្ទាល់ខ្លួនរយៈពេលប្រមាណជាង ១ ឆ្នាំ ហើយនោះ តារាចម្រៀងស្រីរូបនេះ បានបញ្ចេញសំឡេងរបស់ខ្លួនជាថ្មី បន្ទាប់ពីនៅតែឃើញ មានការបិតបាំង, ការបំពាន ក្លែងបន្លំ, ការរើសអើង, ការទទួលបានភាពឈឺចាប់កាន់តែខ្លាំង, ហើយមិនទទួលបានសេចក្ដីពិតគ្រប់គ្រាន់, ការមិនមានទំនួលខុសត្រូវគ្រប់គ្រាន់ និង ការមិនមានមនុស្សធម៌គ្រប់គ្រាន់ពីប្រទេសថៃមកលើកម្ពុជា។
ដោយហេតុផលខាងលើនេះហើយ ជាមូលហេតុធ្វើឱ្យកញ្ញា ឡរ៉ា ម៉ម សម្រេចចិត្តនិពន្ធបទចម្រៀង «Bombs and Borders» ដើម្បីឆ្លុះបញ្ចាំងពីសោកនាដកម្ម និង ភាពឈឺចាប់ ដែលប្រជាជនកម្ពុជាកំពុងឆ្លងកាត់ក្នុងជីវិតប្រចាំថ្ងៃ ក៏ដូចជាការឆ្លុះបញ្ចាំងឃើញនូវជំងឺបាក់ទឹកចិត្ត ការបាក់ស្បាត និង ជំងឺប៉ះទង្គិចផ្លូវចិត្តជាសហគមន៍ ដែលប្រជាជនខ្មែរកំពុងតែឆ្លងកាត់សាជាថ្មីម្ដងទៀត ដោយសារសង្គ្រាម។
ចម្រៀងក្នុងវីដេអូនេះ កញ្ញា បាននិពន្ធជាភាសាអង់គ្លេស ដើម្បីឱ្យពិភពលោកអាចយល់ពីសម្រែកនៃសេចក្ដីទុក្ខសោក ដែលប្រជាជនខ្មែរយើងកំពុងឆ្លងកាត់ និង សង្ឃឹមថា វីដេអូចម្រៀងនេះ និង អាចជួយឱ្យពិភពលោកយល់ពីអារម្មណ៍របស់ប្រជាជនខ្មែរនៅពេលនេះ៕
សូមចុចទីនេះ ដើម្បីទស្សនាវីដេអូ៖
