ពុទ្ធោ! ស្រ្តីវៀតណាមម្នាក់ចង់បន្សាបជាតិពុល បែកគំនិតលាយទឹកក្រូចឆ្មារជាមួយអំបិល បាញ់លាងពោះវៀនតាមទ្វារធំ ចុងក្រោយស្អុយពោះវៀនត្រូវកាត់ចោល

មានករណីដ៏គួរ​ឱ្យហួសចិត្តរបស់ស្រ្តីម្នាក់នៅប្រទេសវៀតណាម ដែលបានលាយទឹកក្រូចឆ្មារជាមួយអំបិល យកទៅបាញ់លាងពោះវៀនតាមទ្វារធំរយៈពេល ៦ ខែ ចុងក្រោយគ្មានជួយអ្វី បានតែស្អុយពោះវៀន ហើយត្រូវកាត់ចោល ដើម្បីជួយជីវិត។

តាមព័ត៌មានបានឱ្យដឹងថា ស្រ្តីរូបនេះមានឈ្មោះថា Nguyen Thi Huong មានវ័យ ៥៤ ឆ្នាំ មកពីខេត្ត ខេត្ត Bac Ninh ប្រទេសវៀតណាម។ ស្រ្តីរូបនេះបានទៅទទួលការព្យាបាលពីមន្ទីរពេទ្យ Bac Ninh General Hospital No.1 ក្រោយពីមានអាការឈឺពោះ ហើមពោះ អស់កម្លាំងល្ហិតល្ហៃ។ តាមរយៈលទ្ធិផល បានឱ្យដឹងថា ស្រ្តីរូបនេះមានការស្ទះពោះវៀន និង រលាកទាំងពោះវៀនតូច ពោះវៀនធំ មានសារធាតុរាវជាច្រើននៅក្នុងពោះ ហើយពោះវៀនធំមានស្អុយរលួយនៅចំណុច Sigmoid ដែលអាចបង្កឱ្យគ្រោះថ្នាក់ដល់ជីវិត។

យ៉ាងណាមិញ ខាងគ្រូពេទ្យបានធ្វើការវះកាត់យកចំណុចរលួយនោះចេញ រួចក៏បានធ្វើ colostomy ហើយក្រោយពីវះកាត់បាន ៥ ថ្ងៃ ស្រ្តីខាងលើនេះក៏បានធូរស្បើយឡើងជារឿយៗ។ ដោយឡែក គ្រូពេទ្យបានឱ្យដឹងថា មូលហេតុនៃការប៉ះពាល់ពោះវៀនធ្ងន់ធ្ងរបែបនេះ គឺដោយសារតែស្រ្តីនេះបានធ្វើទឹកបន្សាបជាតិពុល ដោយយកក្រូចឆ្មារលាយជាមួយនឹងអំបិល ហើយបាញ់លាងពោះវៀនតាមទ្វារធំ។​ បើទុកយូរជាងនេះបន្តិចទៀត អាចនឹងធ្លុះពោះវៀន និង អាចស្លាប់បាត់ជីវិតបាន។ ម្យ៉ាងទៀតមិនគួរធ្វើទឹកបន្សាបជាតិពុលដោយមិនមានការណែនាំពីគ្រូពេទ្យឡើយ ព្រោះអាចនឹងបង្កឱ្យមានគ្រោះថ្នាក់ដូចជាករណីនេះ៕

ប្រភព៖ Sanook