កាលពីថ្ងៃទី ១១ ខែឧសភា ឆ្នាំ ២០២៥ កន្លងទៅនេះ នៅប្រទេសថៃបានមានករណីឆេះទៅលើឃ្លាំងស្តុកគ្រឿងសង្ហារិមយីហោដ៏ធំមួយ នៅផ្លូវឆ្លងក្រុង ៥៥ (Soi Chalong Krung 55) ដែលបង្កឱ្យមានការភ្ញាក់ផ្អើលយ៉ាងខ្លាំង។
ករណីឆេះឃ្លាំងស្តុកគ្រឿងសង្ហារិមនេះ កើតឡើងនៅក្នុងសង្កាត់ La Banseak ក្នុងក្រុងបាងកក។ តាមព័ត៌មានបានឱ្យដឹងថា មកទល់ព្រឹកថ្ងៃទី ១២ ខែឧសភា ឆ្នាំ ២០២៥ មន្ត្រីពន្លត់អគ្គិភ័យនៅមិនទាន់អាចគ្រប់គ្រងស្ថានការណ៍បាននៅឡើយ ខណៈអ្នកស្ម័គ្រចិត្តសង្គ្រោះគ្រោះមហន្តរាយនៃប្រទេសថៃ Than Bunwipa លេខ 34-00 បានរាយការណ៍ពីស្ថានភាពចុងក្រោយនៅម៉ោង ៨ និង ២០ នាទី ព្រឹកកន្លងទៅនេះថា ភ្លើងបានបន្តឆេះរាលដាលកាន់តែខ្លាំងនៅចំហៀងឃ្លាំង។
ជាមួយករណីភ្លើងឆេះនេះដែរ អាជ្ញាធរខណ្ឌក្នុងតំបន់ Lat Krabang បានប្រកាសព្រមានដល់ប្រជាពលរដ្ឋនៅក្នុងសង្កាត់កើតហេតុ និង តំបន់ក្បែរនោះផងដែរ ឱ្យពាក់ម៉ាស់ការពារ ដើម្បីចៀសវាងផលប៉ះពាល់ពីផ្សែងពុលដែលកើតចេញពីករណីឆេះនោះ។
គួរឱ្យដឹងដែរថា នៅក្នុងឃ្លាំងស្តុកនោះគឺពោពេញដោយគ្រឿងសង្ហារិមជាច្រើនមុខសម្រាប់នាំចេញ ក្នុងនោះគេឃើញមានដូចជា ប្រអប់ក្រដាស, ប្លាស្ទិច និង កំណាត់ឈើកិន ដែលវាងាយស្រួលដល់ការឆាបឆេះឱ្យរឹតតែខ្លាំង និង ពិបាកគ្រប់គ្រង ហើយមកដល់ពេលនេះគេនៅមិនទាន់អាចប៉ាន់ប្រមាណពីទំហំនៃការខូចខាតបាននៅឡើយ ខណៈភ្លើងនៅតែបន្តឆេះកាន់តែខ្លាំង៕
ប្រភព ៖ Kapook
