ម្ករប៉ារ៉ា ជាសត្វម្យ៉ាងស្ថិតក្នុងក្រុមពួកសត្វថ្លែន ច្រើនធ្វើសំបុករស់នៅក្នុងដី ក្នុងតំបន់ព្រៃស្រោង ពេលខ្លះគេអាចឃើញវាមាននៅរស់លាក់ខ្លួនតាមតំបន់ដីដែលធ្វើកសិកម្មចាស់ៗផងដែរ ខណៈម្ករប៉ារ៉ានេះ ធ្លាប់ត្រូវបានអ្នកវិទ្យាសាស្ត្ររកឃើញជាកំណត់ត្រាថ្មីមួយសម្រាប់ប្រទេសកម្ពុជាយើងផងដែរ។
បើតាម ជីវចម្រុះនៃប្រទេសកម្ពុជា ធ្លាប់បានបញ្ជាក់ឱ្យដឹងថា សត្វនេះមានឈ្មោះខ្មែរ ២ ប្រភេទគឺ ម្ករប៉ារ៉ា ឬ ថ្លែនសណ្តាយប៉ារ៉ា ខណៈឈ្មោះតាមតំបន់ត្រូវបានគេហៅ ពស់ជើង ពស់ដែក ពស់ដី ស្ថិតនៅអំបូរ Scincidae ហើយឧបតិដ្ឋាន នៅកម្ពុជា ថៃ លាវ ភូមា។
តាមប្រភពបានឱ្យដឹងថា ម្ករប៉ារ៉ា មានលក្ខណៈសណ្ឋានដូចជាសត្វពស់ច្រើន ប៉ុន្តែវាមានការបំលាស់ទីយឺតជាង និង មានជើង ៤ ដែលមានម្រាមតូចៗ សម្រាប់ជំនួយឱ្យវាអាចតោងឡើងគ្រប់ទីកន្លែងបាន។ ក្នុងអំបូរម្ករនេះ អ្នកវិទ្យាសាស្ត្របានស្រាវជ្រាវរកឃើញថា វាមានរហូតដល់ ១៦ ប្រភេទឯនោះ ដែលគេស្ថិតក្នុងប្រភេទ Lygosoma s.s។ ម្ករប៉ារ៉ា ភាគច្រើនវាកម្រខាំណាស់ ប៉ុន្តែនៅពុំទាន់មានការសិក្សាណាមួយបញ្ជាក់ថា វាមានពិស ឬ អត់នោះទេ ដូចច្នេះហើយយើងគួរប្រុងប្រយ័ត្នខ្ពស់បើបានជួបវា។
សត្វនេះផងដែរ ជាឧរង្គសត្វមានខ្លួនតូច វាស៊ីសត្វល្អិតជាអាហារ ហើយពិសេសពួកកន្លង់ មេភ្លៀង ចង្រិត និង ពួកអណ្តើកមាសមួយចំនួន។ សត្វម្ករប៉ារ៉ានេះ ក៏ស្ថិតនៅក្នុងបញ្ជីក្រហម IUCN ផងដែរ ជាប្រភេទកំពុងឈានទៅរកការជិតផុតពូជ នេះក៏ព្រោះតែការទន្រ្ទានដីកសិកម្មធ្វើឱ្យមានការប៉ះពាល់ដល់ទីជំរករបស់វា៕
ប្រភព ៖ ជីវចម្រុះនៃប្រទេសកម្ពុជា
