អត់ពិបាកដើរសួរគេ! ចង់ផ្ទេរកម្មសិទ្ធិយានយន្ត កាន់តែឯកសារតម្រូវប៉ុន្មានមុខនេះ ដឹងតែស៊ីផុយហើយ

នាពេលថ្មីៗនេះ ក្រសួងសាធារណការ និង ដឹកជញ្ជូន បានឆ្លើយតបទៅនឹងសំណួរដែលមានអ្នកសួរច្រើនជាងគេប្រចាំខែកញ្ញាថា ៖ «តើបែបបទនីតិវិធីផ្ទេរកម្មសិទ្ធិយានយន្តសម្រាប់ ពលរដ្ឋខ្មែរតម្រូវឱ្យមានឯកសារអ្វីខ្លះ?»។

ទាក់ទិនទៅនឹងករណីនេះ ក្រសួងសាធារណការ និង ដឹកជញ្ជូន បានបញ្ជាក់ពីបែបបទ និង នីតិវិធីផ្ទេរកម្មសិទ្ធិសម្រាប់ពលរដ្ឋខ្មែរ ព្រមទាំងឯកសារតម្រូវដូចខាងក្រោម ៖

– ពាក្យសុំផ្ទេរកម្មសិទ្ធិ ដែលមានកាល់លេខតួ ឬ លេខសាក់ស៊ី (ដែលចម្លងជាក់ស្តែងពីយានយន្ត)

– អត្តសញ្ញាណអ្នកលក់ និង អ្នកទិញ៖

*ពលរដ្ឋខ្មែរ៖ អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)

– ក្នុងករណីអាសយដ្ឋានបច្ចប្បន្ន ខុសពីអាសយដ្ឋានដែលមាននៅក្នុងអត្តសញ្ញាណប័ណ្ណសញ្ជាតិខ្មែរ ត្រូវភ្ជាប់មកជាមួយសៀវភៅគ្រួសារ ឬ សៀវភៅស្នាក់នៅដែលមានបញ្ជាក់ពីអាជ្ញាធរមានសមត្ថកិច្ច។

– បណ្ណសម្គាល់យានជំនិះ (ច្បាប់ដើម) និង ផ្លាកលេខសម្គាល់យានជំនិះ (ករណីផ្ទេរកម្មសិទ្ធិឆ្លងរាជធានី-ខេត្ត)

– វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ

– លិខិតលក់ទិញ ត្រូវធ្វើឡើងនៅទីតាំងផ្តល់សេវាសាធារណៈ និង ចំពោះមុខមន្រ្តីមានសមត្ថកិច្ចផ្ទេរកម្មសិទ្ធិ

– ក្នុងករណីយានជំនិះពុំអាចរកម្ចាស់ដើមឃើញដែលត្រូវបានលក់ទិញបន្តគ្នា អ្នកកាន់កាប់យានជំនិះត្រូវទៅផ្តិតស្នាមដៃលើកិច្ចសន្យាធានានៅប៉ុស្តិ៍នគរបាលរដ្ឋបាល ដែលខ្លួនរស់នៅ។

សម្រាប់ព័ត៌មានលម្អិតបន្ថែម លោកអ្នកអាចទាក់ទងទៅកាន់ក្រសួងសាធារណការ និង ដឹកជញ្ជូន ដែលមានលេខ Hotline ៖ 1275៕