នាពេលថ្មីៗនេះ អ្នកឧកញ៉ា គិត ម៉េង អ្នកជំនួញដ៏មានសក្ដានុពល ជោគជ័យទាំងជំនួញ និង ជោគជ័យទាំងជីវិតគ្រួសារដ៏មានសុភង្គល បានចែករំលែកនូវការរក្សាចិត្តឱ្យត្រជាក់ ពិសេសគឺវិធីរម្ងាប់កំហឹងដោយប្រាជ្ញា ត្បិតថាកំហឹងប្រៀបដូចជាភ្លើង ដែលអាចចាប់ផ្តើមឆេះតិចតួច ប៉ុន្តែអាចឆេះរីករាលដាលបានយ៉ាងឆាប់រហ័ស។
ខាងក្រោមនេះ គឺជាវិធីមួយចំនួនដើម្បីរម្ងាប់កំហឹងរបស់អ្នក ដោយការប្រើប្រាជ្ញា ដែលចែករំលែកដោយ អ្នកឧកញ៉ា គិត ម៉េង ៖
១. ស្វែងរកម្លប់៖ ដើរចេញពីកម្តៅ
នៅពេលដែលព្រះអាទិត្យក្តៅខ្លាំង យើងតែងស្វែងរកជម្រកក្រោមដើមឈើ ឬក្នុងផ្ទះ។ ដូចគ្នានេះដែរ ពេលអ្នកខឹងខ្លាំង សូមដកឃ្លាមកដោះស្រាយអារម្មណ៍របស់អ្នកសិន។ សូមទុកពេលឱ្យខ្លួនអ្នកត្រជាក់ចិត្តបន្តិចសិន មុននឹងឆ្លើយតបទៅនឹងស្ថានការណ៍ណាមួយ។ ការដកឃ្លាមួយភ្លែតរបស់អ្នកអាចបង្ការការសោកស្ដាយអស់មួយជីវិតដោយសារតែកំហឹង។
២. រក្សាផ្លូវចិត្តរបស់អ្នកឱ្យស្រស់ថ្លា
ទឹកមានសារៈសំខាន់ក្នុងការរក្សាសីតុណ្ហភាពរាងកាយបានល្អ។ ដូចគ្នានេះដែរ ប្រាជ្ញាជាទឹកដែលពន្លត់ភ្លើងកំហឹង។ សូមជញ្ជឹងគិតលើការរៀន ឬសម្រង់សម្តីដែលរំឭកអ្នកពីភាពឥតប្រយោជន៍នៃកំហឹង។ ឧទាហរណ៍៖ អ្នកកាន់តែខឹង អ្នកកាន់តែធ្វើបាបខ្លួនឯង មិនមែនអ្នកដទៃនោះទេ។
៣. ដកដង្ហើមវែងៗ
ដកដង្ហើមយឺតៗចំនួន៣ដង (ចូលតាមច្រមុះ ចេញតាមមាត់)។ ទង្វើដ៏សាមញ្ញនេះអាចជួយអ្នកឱ្យគ្រប់គ្រងអារម្មណ៍ឡើងវិញ និងមើលឃើញស្ថានភាពកាន់តែច្បាស់។
៤. មានចិត្តសប្បុរស៖ បណ្ដុះការយល់ដឹង
ទោះបីអាកាសធាតុក្តៅក៏ដោយ ក៏រុក្ខជាតិដុះលូតលាស់រឹងមាំក្រោមពន្លឺព្រះអាទិត្យបានដែរ។ ក្តីមេត្តាអាចកើតមាន ក្នុងអំទ្បុងពេលមានជម្លោះផងដែរ។ សូមព្យាយាមមើលស្ថានភាពតាមរយៈទស្សនៈរបស់អ្នកដទៃ។ កំហឹងរបស់អ្នកអាចរលាយបាត់ នៅពេលដែលក្តីមេត្តា និងការយល់ដឹងកើតមាន។
៥. រម្សាយអារម្មណ៍ខឹងសម្បា
មិនថាថ្ងៃក្តៅប៉ុនណា នៅពេលរាត្រីមកដល់ កម្តៅនឹងធ្លាក់ចុះ។ កំហឹងក៏ដូចគ្នាដែរ គឺមិនឋិតឋេរនោះទេ។ សូមរំឭកប្រាប់ខ្លួនអ្នកថាអារម្មណ៍មួម៉ៅនេះនឹងរសាយបាត់ទៅ។ ការរម្សាយកំហឹងគឺប្រៀបដូចជាការទទួលបាននូវផាសុកនៃខ្យល់ត្រជាក់នាពេលរាត្រី បន្ទាប់ពីអាកាសធាតុក្តៅនៅពេលថ្ងៃ។
អ្នកឧកញ៉ា បានឱ្យដឹងទៀតថា នៅពេលដែលភ្លើងកំហឹងរាលឡើង សូមចងចាំមេរៀននេះ។ សូមស្វែងរកម្លប់ ធ្វើឱ្យអារម្មណ៍អ្នកស្រស់ថ្លា ដកដង្ហើម បង្ហាញក្តីមេត្តា និង ទទួលយកអារម្មណ៍ស្ងប់ស្ងាត់នៅពេលរាត្រី។ នៅពេលអ្នកប្រើប្រាជ្ញារបស់អ្នកធ្វើជាមគ្គនាយក អ្នកអាចគ្រប់គ្រងអារម្មណ៍ដ៏តានតឹងនានារបស់អ្នក ដោយការរក្សាបាននូវភាពស្ងប់ស្ងាត់ និង ក្តីមេត្តា៕
