អ្នកនាំពាក្យខេត្តបន្ទាយមានជ័យ បញ្ជាក់ថាស្ថានភាពព្រឹកនេះ នៅតំបន់ក្តៅទាំង ៣ តាមបន្ទាត់ព្រំដែន តាមាន់ តាក្របី និង ថ្មដូន មានសភាពស្ងប់ស្ងាត់

នៅព្រឹកថ្ងៃទី ២៩ ខែកក្កដា ឆ្នាំ ២០២៥ នេះ តាមរយៈឯកឧត្តម ម៉េត មាសភក្តី អ្នកនាំពាក្យរដ្ឋបាលខេត្តបន្ទាយមានជ័យ បានជូនដំណឹងឱ្យបានដឹងថា ព្រឹកនេះ ស្ថានភាពតំបន់ក្តៅទាំង ៣ តាមបន្ទាត់ព្រំដែន តាមាន់ តាក្របី និងថ្មដូន មានសភាពស្ងប់ស្ងាត់ រីឯជនភៀសសឹកនៅជំរំ កំពុងបន្តស្នាក់នៅ។

គួរឱ្យដឹងផងដែរថា ភាពស្ងប់ស្ងាត់នេះ កើតឡើងបន្ទាប់ពីមានកិច្ចព្រមព្រៀងចរចាបទឈប់បាញ់ជាបន្ទាន់ និង ឥតលក្ខខណ្ខរវាងកងទ័ពកម្ពុជា-ថៃ ខណៈនៅព្រឹកថ្ងៃទី ២៩ ខែកក្កដា ឆ្នាំ ២០២៥ នេះ មានកិច្ចប្រជុំក្រៅផ្លូវការ រវាងមេបញ្ជាការភូមិភាគកម្ពុជា-ថៃ។

ក្រោយកិច្ចចរចាបទឈប់បាញ់ជាបន្ទាន់ និង ឥតលក្ខខណ្ខរវាងកងទ័ពកម្ពុជា-ថៃ ប្រជាពលរដ្ឋក្នុងខេត្តឧត្តរមានជ័យទាំងអស់គ្នា ពិសេសជនភៀសសឹកនៅក្នុងទីជម្រកមានសុវត្ថិភាពជាង ៣ ម៉ឺននាក់ មានទាំងមនុស្សចាស់ ស្ត្រី និង កុមារផង ក៏ដូចជាទូទាំងប្រទេស មានក្តីរំភើបរីករាយក្រៃលែង និង សូមគោរពដឹងគុណជាទីបំផុតចំពោះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និង សម្តេចធិបតីនាយករដ្ឋមន្ត្រី ព្រមទាំងថ្នាក់ដឹកនាំ មន្ត្រីរាជការ វីរកងទ័ពជួរមុខ កងកម្លាំងគាំទ្រគ្រប់ប្រភេទ ប្រទេសជាមិត្តដែលឈឺឆ្អាល ពិសេសប្រជាពលរដ្ឋគ្រប់មជ្ឈដ្ឋាន ដែលបានខិតខំរួមគ្នាបញ្ឈប់សង្គ្រាម និង ស្វែងរកបានសន្តិភាពនាថ្ងៃនេះ៕