ថ្មីៗនេះ ព័ត៌មានបរទេសមួយបានទម្លាយពីកំហុសផ្នែកវេជ្ជសាស្រ្តដ៏ធ្ងន់ធ្ងរបានកើតឡើងនៅមន្ទីរពេទ្យ Henri-Mondor ក្នុងទីក្រុង Gretay ប្រទេសបារាំង ដោយគ្រូពេទ្យបានច្រឡំវះកាត់យកក្រលៀនសុខភាពល្អរបស់អ្នកជំងឺចេញ ហើយទុកក្រលៀនដែលកើតមហារីកនៅដដែល។
តាមព័ត៌មានបានឱ្យដឹងថា អ្នកជំងឺមានវ័យ ៧៧ ឆ្នាំ បានកើតជំងឺមហារីកក្រលៀន ហើយបានចូលមកព្យាបាល និង ទទួលការវះកាត់នៅក្នុងមន្ទីរពេទ្យខាងលើ។ អ្វីដែលគួរឱ្យហួសចិត្ត គឺក្រុមគ្រូពេទ្យបានច្រឡំវះកាត់យកក្រលៀនសុខភាពល្អចេញ ហើយទុកក្រលៀនដែលកើតមហារីកឱ្យនៅដដែល។
យ៉ាងណាមិញ កំហុសដ៏ធំនេះបានធ្វើឱ្យអ្នកជំងឺ និង ក្រុមគ្រួសារមានការខកចិត្តជាខ្លាំង។ ក្រោយមកអ្នកជំងឺត្រូវគេបញ្ជូនទៅធ្វើការវះកាត់សង្រ្គោះម្តងទៀតនៅមន្ទីរពេទ្យ។ ចុងក្រោយក្រុមគ្រួសាររបស់ជនរងគ្រោះ ក៏បានដាក់ពាក្យបណ្តឹងទៅកាន់មន្ទីរពេទ្យ ដើម្បីស៊ើបអង្កេតស្វែងរកមូលហេតុពិត និង អ្នកទទួលខុសត្រូវចំពោះករណីនេះផងដែរ៕
