ក្នុងឈុតហូលខ្មែរ ចូលរួមកម្មវិធី ព្រះអង្គម្ចាស់ក្សត្រិយ៍ នរោត្តម ពង្សសូរិយា ពិតជាស្រស់សោភា សមសួនគ្មានកន្លែងទាស់

កិត្តិសព្ទរបស់ព្រះអង្គម្ចាស់ក្សត្រិយ៍ នរោត្តម ពង្សសូរិយា ដែលមានសម្រស់ព្រះកាយស្រស់សោភា និង ព្រះជន្មក្មេងវ័យមួយអង្គនៅសែរាជវង្សានុវង្សខ្មែរ បានលេចឮល្បីរន្ទឺជារឿយៗនៅលើបណ្តាញសង្គម។ ជាក់ស្តែង ដូចថ្មីថ្មោងនេះ តាមរយៈគណនីហ្វេសប៊ុក Soriya Norodom (ពង្ស់សូរិយា នរោត្តម) ទ្រង់បានធ្វើឱ្យមហាជនលើបណ្តាញសង្គមផ្ទុះការចាប់អារម្មណ៍ខ្លាំង ជាមួយរូបភាពប៉ុន្មានសន្លឹក ដែលទ្រង់គ្រងឈុតហូលខ្មែរ យាងចូលរួមក្នុងកម្មវិធីមួយពិតជាសមសួន រមទម ស្រស់សោភាឥតខ្ចោះ។

ជាក់ស្តែង ឈុតហូលដែល ព្រះអង្គម្ចាស់ក្សត្រិយ៍ នរោត្តម ពង្សសូរិយា ទ្រង់គ្រង ជាម៉ូដអាវដៃខ្លីប៉ោងស្មា និង មានលេងម៉ូដចងខ្សែនៅត្រង់ក មើលមកលាតសាមញ្ញ តែលាយឡំប្រកបដោយប្រណីតភាព និង ភាពសមសួន។ ប្រើជាឈុតនឹងសំពត់បត់ ទ្រង់បានបន្ថែមគ្រឿងលម្អតិចតួចពណ៌មាសរំលេចក្បាច់ខ្មែរដូចជា ខ្សែដៃ និង ក្រវិល ជាពិសេស កាបូបពណ៌មាសភ្លឺរលោង ពិតជាលេចធ្លោ និង ទាក់ទាញបំផុត។​

ក្នុងឈុតសម្លៀកបំពាក់នេះ បើតាមការបង្ហោះរូបភាពពីក្រុមថតរូប​ ព្រះអង្គម្ចាស់ក្សត្រិយ៍ នរោត្តម ពង្សសូរិយា ទ្រង់បានយាងចូលរួមពិធីភ្ជាប់ពាក្យរបស់ លោក គួច វរ្ម័ន ដែលសហគ្រិនវ័យក្មេងល្បីឈ្មោះ និង ជានាយកប្រតិបត្តិនៃក្រុមហ៊ុន Future Focus Solutions & Pharma Co.,Ltd ជាក្រុមហ៊ុនផ្គត់ផ្គង់សម្ភារពេទ្យ និង ផលិតផលឱសថ។ កម្មវិធីនេះ ទើបបានធ្វើឡើងកាលពីថ្ងៃទី ៩ ខែ កុម្ភៈ ឆ្នាំ ២០២៥៕