ថ្មីៗនេះ មហាជននិយមតាមដានបណ្តាញសង្គមច្បាស់ជាបានជ្រាបមកហើយ ពីប្អូនស្រីជនភៀសសឹកដែលកំពុងផ្ទុះការចាប់អារម្មណ៍ ចេះនិយាយ ៤ ភាសា តាមរយៈការរៀនតាមអនឡាញដោយខ្លួនឯង មានឈ្មោះហៅក្រៅថា Nelly បន្ទាប់ពីអ្នកផលិតមាតិកាល្បីម្ចាស់ Channel Youtube «China Mac Tv» ឈ្មោះ Raymond Yu ហៅ Mac បានទៅជួបរូបនាង និង បង្ហោះវីដេអូនោះ។
បន្ទាប់ពី វីដេអូរបស់ Mac បានចេញផ្សាយ និង មានការទស្សនាច្រើនទាំងក្នុង និង ក្រៅប្រទេសកម្ពុជានោះ ធ្វើឱ្យមហាជន អាណិតស្រឡាញ់ និង សរសើរដល់នាង រហូតមានការជួយឧត្ថម្ភជាថវិកា និង ឱ្យនាងបានសិក្សាបន្តដោយឥតគិតថ្លៃថែមទៀតផង។
ដោយឡែក កាលពីយប់ថ្ងៃទី ០៨ ខែសីហា ឆ្នាំ ២០២៥ កន្លងទៅ លោក Mac បានចូលរួមជាភ្ញៀវក្នុងកម្មវិធី Podcast របស់លោក រៀនថត និង បាននិយាយដំណើរដើមទងនៃការទៅកាន់ជំរំភៀសសឹករហូតមាននិស្ស័យបានជួប Nelly។
លោក Mac បានឱ្យដឹងថា ថ្ងៃដែលលោកបានមកដល់ប្រទេសកម្ពុជាដំបូង ក្នុងខេត្តសៀមរាប គឺលោកមិនស្គាល់នរណាម្នាក់នោះឡើយ គឺលោកដើរជជែក និយាយជាមួយប្រជាជនកម្ពុជា និង ប្រាប់ថាលោកចង់ទៅតំបន់កំពុងមានបញ្ហាទម្រាំរកបានតៃកុងឡានជូនលោកទៅ។
ថ្ងៃដំបូង លោក Mac គិតថាលោកអាចនឹងចំណាយប្រាក់ប្រមាណ ៥០០ ទៅ ៦០០ ដុល្លារប៉ុណ្ណោះ សម្រាប់ជនភៀសសឹក ប៉ុន្តែនៅពេលទៅដល់ទីតាំងលោកមានអារម្មណ៍ថារន្ធត់ចិត្ត ហើយប្រាក់នេះ គឺពិតជាមិនគ្រប់នោះទេ។ ម្យ៉ាងវិញទៀតនោះ អ្វីដែលធ្វើឱ្យលោកអាណិតខ្លាំងបំផុត គឺឃើញមានស្ត្រីម្នាក់ទើបតែសម្រាលកូនរួច ហើយត្រូវជម្លៀសខ្លួនទាំងកូនង៉ែតមិនទាន់មានសម្លៀកបំពាក់។
លោក Mac បន្តថា ត្រឡប់ទៅវិញលោកបន់ព្រះ ឱ្យធ្វើយ៉ាងណាឱ្យលោកបានធ្វើអ្វីជួយដល់ជនភៀសសឹកនៅទីនេះផង ព្រោះអ្វីដែលលោកបានធ្វើម្សិលមិញ គឺមិនគ្រប់គ្រាន់នោះឡើយ ស្រាប់តែថ្ងៃបន្ទាប់មិត្តភក្តិរបស់លោកបាន donate ចំនួន ៧ ពាន់ដុល្លារ។ ភ្លាមនោះ លោកក៏បាន cancel សំបុត្រយន្តហោះ និង ប្រញាប់ទៅទិញទំនិញជាច្រើន។ គាប់ជួនសម្រុកទិញទំនិញ ដោយប្រើប្រាស់គណនីធនាគារតាមទូរស័ព្ទដៃ ស្រាប់តែធនាគារបិទការទូរទាត់ដោយលោកចាយច្រើនពេក ដោយបញ្ហានេះលោករកនឹកគិតអ្វីមិនចេញ ក៏សម្រេចទាក់ទងទៅខ្ចីលុយមិត្តភក្តិ ៥ ពាន់ដុល្លារ សិន ហើយបានហើយលោកក៏បន្តទិញទំនិញទៀត។
ពេលវេលាទៅដល់ ជំរុំភៀសសឹករបស់ Nelly លោកបានជួបនាងដំបូង គឺសន្ទនាគ្នាបន្តិច លោក Mac ក៏បានបន្តចែកអំណោយ និង បានចាកចេញពីជំរុំនោះពេលរួចរាល់។ យ៉ាងណាមិញ ធ្វើដំណើរក្នុងឡានបានប្រមាណ ៣០ នាទី លោក Mac មានអារម្មណ៍ស្តាយថា ហេតុអ្វី បានជាលោកមិនទៅជជែកជាមួយនឹង Nelly ក៏ព្រោះនាង គឺជាក្មេងស្រីម្នាក់ ដែលអាចនិយាយភាសាអង់គ្លេស និង បានមករកលោកដើម្បីហ្វឹកហាត់ភាសាអង់គ្លេសជាមួយលោក។
គិតមួយសន្ទុះលោក Mac ក៏សុំតៃកុងឡានឱ្យបកក្រោយ ហើយមករក Nelly នៅជំរុំវិញ បើទោះជាមិនដឹងថា នាងស្នាក់នៅតង់មួយណាក្តី។ អាចជានិស្ស័យ គ្រាន់តែលោក Mac ដើរចូលទៅ ស្រាប់តែលោកឮសំឡេងក្មេងស្រីម្នាក់ ស្រែកថាលោកមកវិញហើយ? ពេលនោះហើយ ដែលលោក Mac បានចាប់ជជែកសួរនាំពី Nelly រហូតធ្វើឱ្យ Nelly ទទួលបានការអាណិតស្រឡាញ់ដូចពេលនេះ។ គួរជម្រាបថា បន្ទាប់ពីជួប Nelly លោក Mac ក៏បានបង្កើតមូលនិធិ ស្វែងរកថវិកាជូននាងទៀតផង៕
សូមចុចទីនេះ ដើម្បីទស្សនាវីដេអូ៖
