កាលពីរសៀលថ្ងៃទី ១៧ ខែកញ្ញា ឆ្នាំ ២០២៥ កន្លងទៅនេះ ទាហានថៃ បានបន្តបំពានលើអធិបតេយ្យភាពកម្ពុជា ដោយបានបន្តរាយបន្លាលួសនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ក្នុងនោះ ក្រៅពីបន្តរាយបន្លាលួសនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ខាងភាគីថៃក៏បានប្រើប្រាស់នូវឧស្ម័នបង្ហូរទឹកភ្នែក មកលើប្រជាពលរដ្ឋកម្ពុជាផងដែរ។
ក្នុងនោះដែរ តាមការឱ្យដឹងពីឯកឧត្តមវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលនៃរដ្ឋបាលខេត្តបន្ទាយមានជ័យបានជម្រាបឱ្យដឹងថា ក្នុងហេតុការណ៍ខាងលើមានអ្នកជំងឺជា វីរៈកងទ័ព ព្រះសង្ឍ និង ប្រជាពលរដ្ឋ ដែលរងរបួសស្រាលនិងធ្ងន់ សរុប ចំនួន ២៩នាក់ ក្នុងនោះស្រី ២ នាក់ ហើយនៅក្នុងមន្ទីរពេទ្យបង្អែកប៉ោយប៉ែត និងមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី ចំនួន ៤ នាក់ និង បានបញ្ជូនទៅកាន់មន្ទីរពេទ្យព្រះអង្គឌួងចំនួន ១ នាក់ (ជាវីរៈកងទ័ព)។
គិតត្រឹមព្រឹកថ្ងៃទី ១៨ ខែកញ្ញា ឆ្នាំ ២០២៥ វេលាម៉ោង ១១ ព្រឹក តាមរយៈការធ្វើបច្ចុប្បន្នភាពពីស្ថានភាពសុខភាពរបស់ប្រជាពលរដ្ឋ និង វីរៈកងទ័ព ៦ រូប ក្នុងចំណោម ២៩ អង្គ/នាក់ ត្រូវឧស្ម័នបង្ហូរទឹកភ្នែក និង កាំភ្លើងគ្រាប់ជ័រពីទាហានថៃ តាមរយៈបណ្តាញសារព័ត៌មាន AKP បានឱ្យដឹងថា ពេលនេះកំពុងទទួលបានការយកចិត្តទុកដាក់ពីសំណាក់គ្រូពេទ្យ។ ក្នុងនោះ ប្រជាពលរដ្ឋ និង វីរៈកងទ័ព ៦ រូប ក្នុងចំណោម ២៩ អង្គ/នាក់រួមមាន៖
១. ពលបាលឯក ម៉ន ភត្ត្រា យោធិននៅវរសេនាតូច ៥១៣ កងពលតូចថ្មើរជើងលេខ ៥១ ដែលត្រូវទាហាន និង ប៉ូលិសថៃបាញ់ដោយប្រើកាំភ្លើងគ្រាប់ជ័រ និង គ្រាប់បែកផ្សែងបណ្តាលឱ្យរងរបួសធ្ងន់ធ្ងរចំភ្នែកបានបញ្ជូនទៅកាន់មន្ទីរពេទ្យអង្គឌួងភ្លាមៗ និង ត្រូវបានយកចិត្តទុកដាក់ព្យាបាលយ៉ាងខ្លាំង។ មកដល់ពេលនេះ ពលបាលឯក ម៉ន ភត្ត្រា ក៏បានធ្វើការវះកាត់ដោយជោគជ័យ និង កំពុងបន្តសម្រាកព្យាបាលផងដែរ។
២. រីឯប្រជាពលរដ្ឋ ៥ នាក់ទៀត ដែលរងគ្រោះដោយផ្សែងពុលពីសំណាក់កងកម្លាំងចម្រុះថៃ កំពុងសម្រាកព្យាបាលនៅមន្ទីរពេទ្យបង្អែក ប៉ោយប៉ែត ខេត្តបន្ទាយមានជ័យចំនួន ៤ រូប មានឈ្មោះ មាស គឹមហេង, ភិន វី, មាន សំបូរ និង ពៅ តុលា ដែលសុទ្ធតែជាប្រជាពលរដ្ឋរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ។
ចំណែកប្រជាពលរដ្ឋ ១ រូបទៀតមានឈ្មោះ សួន វណ្ណ លោកកំពុងសម្រាកព្យាបាលនៅមន្ទីរពេទ្យមង្គលបុរី ខេត្តបន្ទាយមានជ័យ៕
រូបថត៖ ខឹម សុវណ្ណារ៉ា / AKP
