សារព័ត៌មានក្នុងប្រទេសឥណ្ឌូនេស៊ី បានរាយការណ៍ពីការបាត់ខ្លួនរបស់ Influencer ម្នាក់ អស់ចំនួន ៣ ថ្ងៃ ក្រោយពីបានចូលទៅក្នុងព្រៃ ដើម្បីធ្វើ Content ទាក់ទងនឹងរឿងអមនុស្ស។
តាមព័ត៌មានបានឱ្យដឹងថា នារីរូបនេះឈ្មោះថា Eyga វ័យ ២២ ឆ្នាំ ជាជនជាតិម៉ាឡេស៊ី។ ក្រុមការងាររបស់នាងទាំងអស់មានចំនួន ២០ នាក់ ដែលបាននាំគ្នាទៅព្រៃនៅម្តុំ តំបន់ Bandung ខេត្ត Java ខាងលិច ប្រទេសឥណ្ឌូនេស៊ីនោះ ហើយក្នុងនោះមាន ៧ នាក់បានចូលទៅក្នុងព្រៃជាមួយនាង ដើម្បីថតវីដេអូទាក់ទងនឹងរឿងអមនុស្ស ដោយនាងគឺជាមនុស្សស្រីតែម្នាក់គត់ និង ជាអ្នកដឹកនាំដោយផ្ទាល់។
យ៉ាងណាមិញ នៅម៉ោងប្រមាណ ២ រសៀល ថ្ងៃទី ៣ ខែកុម្ភៈ ឆ្នាំ ២០២៥ នាងក៏ស្រាប់តែបាត់ខ្លួនពីក្រុមទៅ ដែលធ្វើឱ្យសមាជិកម្នាក់ៗផ្អើលឆោឡោសុំជំនួយពីអ្នកស្រុកឱ្យជួយនាំគ្នាតាមរក រហូតផ្អើលដល់អាជ្ញាធរចុះមកអន្តរាគមន៍។ រហូតមកដល់ប្រមាណម៉ោង ១០ យប់ នាថ្ងៃទី ៥ ខែកុម្ភៈ ឆ្នាំ ២០២៥ គេក៏បានរកនាងឃើញ នៅចម្ងាយពីកន្លែងដែលនាងបាត់ខ្លួនចំនួន ២០០ ម៉ែត្រ ដោយនាងស្ថិតនៅក្នុងសភាពទន់ខ្សោយគួរឱ្យបារម្ភ។ ដោយឡែក ក្រោយមកទើបដឹងថា Influencer រូបនេះ និង ក្រុមការងារគ្រាន់តែសម្ដែងដើម្បីចង់បានការចាប់អារម្មណ៍ប៉ុណ្ណោះ៕
ប្រភព៖ Kapook
