នៅថ្ងៃទី ១១ ខែសីហា ឆ្នាំ ២០២៥ លោក ស្វាយ តុញ ចៅក្រមសើបសួរសាលាដំបូងខេត្តកណ្តាល បានចេញដីកាឃុំខ្លួនគ្រូបង្រៀនម្នាក់នៅស្រុកកៀនស្វាយ ខេត្តកណ្តាល ដែលបង្គាប់ឱ្យសិស្សស្រីថតរូបអាក្រាតកាយ ជាថ្នូរបានពិន្ទុល្អ ដាក់ពន្ធនាគារជាបណ្តោះអាសន្ន។
តាមប្រភពព័ត៌មានបានឱ្យដឹងថា គ្រូបង្រៀនរូបនេះ ត្រូវបានលោកស្រី ផាន់ សុគន្ធថង តំណាងអយ្យការអមសាលាដំបូងខេត្តកណ្តាល បានចោទប្រកាន់ពីបទ «គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ» និង «រុកកួនខាងផ្លូវភេទ»។ អ្នកនាំពាក្យបានបញ្ជាក់ថា បទល្មើសនេះយោងតាមក្រមព្រហ្មទណ្ឌ មាត្រា ២៣២ ចែងដែលបានថា «បទគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ» ត្រូវផ្ដន្ទាទោសដាក់ពន្ធនាគារពី ៦ ខែ ទៅ ២ ឆ្នាំ និងពិន័យជាប្រាក់ពី ១ លានរៀល ទៅ ៤ លានរៀល។
សូមរំឭកផងដែរថា ការឃុំខ្លួនខាងលើ ធ្វើឡើងក្រោយទទួលបានបណ្ដឹងរបស់អាណាព្យាបាលសិស្សឈ្មោៈ ជ.ម.ន.ហ្សា នៅថ្ងៃទី ២១ ខែកក្កដា ឆ្នាំ ២០២៥ មន្ត្រីជំនាញផ្នែកព្រហ្មទណ្ឌស្រុក បានស្រាវជ្រាវលើករណីគំរាមបង្ហោះរូបភាព និង ឆាត ទៅលើករណីលោកគ្រូបង្រៀនមួយរូប មានឈ្មោះ ហឿន រ៉ាវី ភេទប្រុស អាយុ ៣៨ ឆ្នាំ ជនជាតិខ្មែរ គ្រូបង្រៀនថ្នាក់ទី ៩-១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល ខណៈកូនសិស្សមានឈ្មោះ ជ.ម.ន.ហ្សា ភេទស្រីអាយុ ១៥ ឆ្នាំ ជនជាតិខ្មែរ មុខរបរសិស្សថ្នាក់ទី ៩ មានទីលំនៅភូមិព្រែកស្វាយ ឃុំឈើទាល ស្រុកកៀនស្វាយ ខេត្តកណ្តាល៕
