មហាជនអ្នកគាំទ្ររបស់តារាសម្ដែងស្រី ឈុំ ចាន់ដារ៉ា បានជ្រាបហើយ បន្ទាប់ពីខកខានឱកាសតំណាងកម្ពុជាចេញទៅប្រកួតលើឆាកអន្តរជាតិក្នុងនាមជា Miss Supranational Cambodia 2024 ស្រាប់តែថ្មីៗនេះ កញ្ញាក៏បានធ្វើឱ្យមហាជនអ្នកគាំទ្រផ្ទុះចាប់អារម្មណ៍ភ្ញាក់ផ្អើលជាថ្មី ក្រោយពីបានឃើញវត្តមានរបស់នាងដាក់ពាក្យចូលរួមប្រកួតក្នុងកម្មវិធីដដែលនេះ ដើម្បីដណ្ដើមមកុដប្រចាំឆ្នាំ ២០២៥ ម្ដងទៀត។
ដំណឹងនេះដែរ ត្រូវបានមហាជនអ្នកគាំទ្ររបស់កញ្ញា ឈុំ ចាន់ដារ៉ា ផ្ទុះការចែករំលែក និង បង្ហាញការគាំទ្រលើកទឹកចិត្តយ៉ាងពេញទំហឹង ដោយរំភើបចិត្តចំពោះការវិលត្រឡប់ជាថ្មីរបស់នាងក្នុងការប្រកួតដណ្ដើមមកុដម្ដងទៀតក្នុងកម្មវិធី Miss Supranational Cambodia 2025 នេះ។
យ៉ាងណាមិញ បើនិយាយពីសមត្ថភាពវិញ តារាសម្ដែងស្រី ឈុំ ចាន់ដារ៉ា ក៏ទទួលបានការស្រឡាញ់ពេញចិត្តខ្លាំងពីមហាជនអ្នកគាំទ្រ តាំងពីជាម្ចាស់មកុដ Miss Supranational Cambodia 2024 មក ដោយសារមើលឃើញថាកញ្ញា ឈុំ ចាន់ដារ៉ា ជាតារាសម្ដែងស្រីដែលមានទាំងសមត្ថភាព ទេពកោសល្យ ព្រមទាំងរូបសម្រស់ស្រស់ស្អាត មានចំណេះដឹងស័ក្តិសមតំណាងឱ្យកម្ពុជាលើឆាកអន្តរជាតិយ៉ាងពិតប្រាកដ។
លើសពីនេះ អ្វីដែលគួរឱ្យសរសើរនោះ ដ្បិតតែតារាសម្ដែងស្រីរូបនេះ ទើបតែប្រឡូកក្នុងវិស័យបវរកញ្ញា និង ពុំមានបទពិសោធច្រើនពីមុនមកមែន ប៉ុន្តែឃើញថានាងហាក់មានភាពជឿជាក់ខ្លាំង រីឯសមត្ថភាពនៃការដើរផ្សេងៗក៏លេចធ្លោមិនធម្មតាដែរ។ ជាក់ស្ដែង ថ្មីៗនេះ ស្របពេលដាក់ពាក្យចូលប្រកួតក្នុងកម្មវិធីម្ដងទៀត ឈុំ ចាន់ដារ៉ា កាន់តែផ្ទុះការសរសើរពីមហាជនអ្នកគាំទ្រពីសមត្ថភាពនៃការដើរ ដោយកញ្ញាបានបង្ហាញការហ្វឹកហាត់រាល់ថ្ងៃកាន់តែលះស្អាតលេចធ្លោខ្លាំង៕
