នៅព្រឹកថ្ងៃទី ១៥ ខែតុលា ឆ្នាំ ២០២៥ នេះ អភិបាលខណ្ឌច្បារអំពៅ លោក ចេង មុនីរ៉ា បានបង្ហោះសារឱ្យដឹងថា បន្ទាប់ពីបានស្តាប់នូវពាក្យអសុរោះ អសីលធម៌របស់ឈ្មោះ សុភ័ណ្ឌ កក្កដា ថាលោកធ្វើបុណ្យយកមុខរួចមក លោកពិតជាមានការសោកស្តាយផង និង អាណិតផងចំពោះបុគ្គលអសីលធម៌នេះណាស់។
ក្នុងនោះលោកភិបាលខណ្ឌបានបញ្ជាក់ឱ្យដឹងថា តំបន់ផ្សារបឹងព្រលិតនេះ (ឈ្មោះជាផ្សារ ប៉ុន្តែពុំសូវមានដំណើរការទេ) ហើយពុំមែនជាបុរីដូចការលើកឡើងបែបមួលបង្កាច់ទេ។ ជាសំណង់ផ្ទះល្វែង ដែលជាន់ផ្ទាល់ដីម្ចាស់ផ្សេង និង ជាន់ទី១ ម្ចាស់ផ្សេង ដំបូងឡើយជាន់ផ្ទាល់ដីមានតម្លៃត្រឹម ៦០០០ ដុល្លារ និងជាន់ទី១ មានតម្លៃ ៣០០០ ដុល្លារ។
លោកអភិបាលខណ្ឌបានបន្តទៀតថា ៖ «ដោយចុងរដូវវស្សាឆ្នាំនេះ មានភ្លៀងធ្លាក់ច្រើន ហើយទឹកទន្លេឡើងខ្ពស់ ធ្វើឱ្យទឹកច្រាលចេញពីលូផង និង ទឹកភ្លៀងធ្លាក់ច្រើនផង ធ្វើឱ្យលិចផ្លូវ និង លំនៅឋានបងប្អូនប្រជាពលរដ្ឋក្នុងតំបន់នេះ។ ខ្ញុំបានចុះពិនិត្យទីតាំងនេះ ហើយបានសហការជាមួយការិយាល័យសុខាភិបាលខណ្ឌ ចែកថ្នាំការពាររោគសើស្បែក (ថ្នាំការពារ/ព្យាបាលទឹកសុីជើង) ជូនបងប្អូនប្រជាពលរដ្ឋ សំណេះសំណាលសួរសុខទុក្ខ និង ជម្រាបអំពីវិធានការដែលត្រូវដោះស្រាយ ដើម្បីរំដោះទឹកចេញឱ្យបានលឿនបំផុត ដើម្បីធានាបាននូវប្រក្រតីភាពនៃជីវភាពរស់នៅប្រចាំថ្ងៃរបស់ពួកគាត់ ហើយក៏បានទទួលនូវសំណូមពរអំពីការខ្វះខាតជីវភាពប្រចាំថ្ងៃ នៅក្នុងអំឡុងពេលទឹកលិចនេះផងដែរ»។
លោកអភិបាលខណ្ឌបានបន្តឱ្យដឹងថា ដូច្នេះហើយទើបថ្ងៃបន្ទាប់លោកបានឆ្លើយតបសំណូមពរបងប្អូនប្រជាពលរដ្ឋ ដោយបានដឹកនាំសហការីចែកស្បៀង ថ្នាំការពាររោគសើស្បែកបន្ថែម និង បាញ់ថ្នាំសម្លាប់មូសការពារជំងឺគ្រុនឈាមជូនដល់ពួកគាត់ថែមទៀតផង។
ចំពោះករណីនេះ លោកអភិបាលខណ្ឌសង្ឃឹមថា សំណេររបស់លោកនឹងបានជាព័ត៌មានពិតដល់បងប្អូនគ្រប់មជ្ឈដ្ឋានចៀសវាងបាននូវការយល់ច្រឡំ ហើយលោកមិនឆ្លើយតបបែបអសីលធម៌ជូនចំពោះឈ្មោះ សុភ័ណ្ឌ កក្កដា វិញទេ។ លោកអភិបាលខណ្ឌសង្ឃឹមថា ការបួសរៀនរបស់ឈ្មោះ កក្កដា សុភ័ណ្ឌ កន្លងមក នឹងដាស់សតិ និង ដួងវិញ្ញាណរបស់គាត់ឱ្យចេះឱ្យតម្លៃអ្នកនៅជុំវិញខ្លួន ទើបខ្លួនមានតម្លៃ៕
