ជាការពិតណាស់ បច្ចុប្បន្នមានអ្នកផលិតមាតិកាធ្វើម្ហូបជាច្រើននៅលើបណ្តាញសង្គមនានា ដែលកំពុងទទួលបានការចាប់អារម្មណ៍ពីសំណាក់អ្នកនិយមផ្នែកចម្អិនអាហារ។ ក្នុងនោះដែរ ក៏មានអ្នកផលិតមាតិកាធ្វើម្ហូបជនបទចំនួន ២ រូប ក៏ត្រូវបានមហាជនចាប់អារម្មណ៍ និង សរសើរព្រមគ្នាដែរ ខណៈអ្នកទាំង ២ រូបនោះ រមែងចម្អិនអាហារចែកជូនកុមារៗនៅក្នុងភូមិស្រុកផងនោះ។
១. កញ្ញា ឆម ស្រីផាច
អ្នកផលិតមាតិកាម្ហូប នៅខេត្តបន្ទាយមានជ័យ កញ្ញា ស្រីផាច ត្រូវបានមហាជនអ្នកលេងបណ្តាញសង្គមនានាគាំទ្រដល់នាងជាខ្លាំង ខណៈមាតិកាម្ហូបរបស់នាងផលិតចេញមកតាមបែបជនបទ និង ប្រើប្រាស់ភាសាតាមតំបន់ផងនោះ។ ក្នុងនោះ ស្រីផាច មិនត្រឹមតែទទួលបានការចាប់អារម្មណ៍ក្នុងការចម្អិនម្ហូបនោះទេ តែអ្នកផលិតមាតិកាម្ហូបរូបនេះ ក៏ទទួលបានការសរសើរពីសំណាក់អ្នកទស្សនា ដោយជារឿយៗ ស្រីផាច តែងធ្វើអាហារចែកជូនក្មេងៗ និង ចាស់ៗក្នុងភូមិឱ្យបានពិសាជុំគ្នាផងនោះ។
២. អ្នកគ្រូ ឃឹម លក្ខិណា
អ្នកផលិតមាតិកាម្ហូបជំនាន់ថ្មី លក្ខិណា នៅខេត្តកំពង់ធំ ដែលត្រូវបានគេស្គាល់ថាជាអ្នកគ្រូបង្រៀនថ្នាក់បឋមសិក្សាមួយរូបនោះ ក៏ត្រូវបានទទួលបានការចាប់អារម្មណ៍ពីមហាជនដូចគ្នាដែរ។ ក្នុងនោះ អ្នកគ្រូ លក្ខិណា ត្រូវបានមហាជនចូលចិត្តខ្លាំង ខណៈអ្នកគ្រូរមែងទិញសម្ភារប្រើប្រាស់ ចំណីចំណុក ជាពិសេសនោះ គឺចម្អិនអាហារឆ្ងាញ់ៗជូនដល់កូនសិស្សរបស់អ្នកគ្រូ៕
