នៅថ្ងៃទី ១១ ខែមីនា ឆ្នាំ ២០២៥ នេះ ស្នងការដ្ឋាននគរបាលខេត្ដកំពង់ស្ពឺ បានជូនដំណឹងពីប្រតិបត្តិការមួយ ក្រោយមានការបង្ហោះថាមានករណីចាប់ជំរិតយកទាំងម៉ូតូទាំងមនុស្ស ក្នុងភូមិសាស្ត្រខេត្តកំពង់ស្ពឺ។
ទាក់ទិនទៅនឹងករណីនេះ ស្នងការដ្ឋាននគរបាលខេត្ដកំពង់ស្ពឺ បានឱ្យដឹងថា កម្លាំងជំនាញផែនការងារសន្ដិសុខ បានសហការស្រាវជ្រាវពីអធិការស្រុកសំរោងទង ករណីព័ត៌មានប្រភពហ្វេសប៊ុក Rern Srey Noch បានបង្ហោះថា ៖ «ប្អូនស្រីខ្ញុំ ត្រូវបានជនមិនស្គាល់មុខបានចាប់ជំរិតយកទាំងម៉ូតូទាំងមនុស្ស នៅចំណុចភូមិថ្មី ឃុំតាំងក្រូច ស្រុកសំរោងទង ខេត្ដកំពង់ស្ពឺ» កាលពីព្រឹកថ្ងៃទី ១០ ខែមីនា ឆ្នាំ២០២៥។
តាមប្រភពបានឱ្យដឹងថា ក្រោយប្រតិបត្ដិការស្រាវជ្រាវរយៈពេល ៦០ នាទី សមត្ថកិច្ចកំណត់បានថាជាករណីប្រឌិតព័ត៌មានក្លែងក្លាយ ដែលធ្លោយចេញពីប្រភពអ្នកអះអាងថាខ្លួនជាជនរងគ្រោះ មានឈ្មោះ គង់ សុខណេង ភេទស្រី អាយុ ១៨ ឆ្នាំ និង កំណត់បានទីតាំងសំងំនិយាយព័ត៌មានប្រឌិត រួចឈានទៅរកឃេីញ និង នាំយកក្មេងស្រីខាងលើត្រឡប់មកផ្ទះវិញ។
ស្នងការដ្ឋាននគរបាលខេត្ដកំពង់ស្ពឺ បានបន្ថែមថា ក្មេងស្រីខាងលេីបានសារភាពថា មូលហេតុធំដែលឈានដល់ការរៀបចំផែនការកុហកបោកប្រាស់ធ្វើព័ត៌មានក្លែងក្លាយនេះ មកពីខ្លួនពិបាកចិត្ដរឿងផ្ទាល់ខ្លួនជំពាក់ប្រាក់អ្នកស្គាល់គ្នា និង បានបេីកប្រាក់ខែយកទៅសងគេហេីយ តែមិនមានប្រាក់ជូនអ្នកផ្ទះ ទេីបរៀបចំសម្ដែងថាគេចាប់ជំរិតទារប្រាក់តែម្ដង៕
