តើអ្វីទៅជាឧបករណ៍ដែលបុរសជឿជាក់ថានឹងជួយឱ្យការរួមភេទកាន់តែរីករាយ? ប៉ុន្តែក្នុងនោះវាក៏បានបង្កគ្រោះថ្នាក់ដែលមិននឹកស្មានដល់ផងដែរ។ តស់! មកស្គាល់ឧបករណ៍ជំនួយការរួមភេទមួយ ដែលមានឈ្មោះថា ភ្នែកពពែ និង គ្រោះថ្នាក់របស់វា។
ទោះបីជាគេនិយាយថាការរួមភេទជារឿងធម្មជាតិក៏ដោយ ប៉ុន្តែមនុស្សមួយចំនួនបានចាត់ទុកការរួមភេទជាការសប្បាយ និង អាចពង្រឹងទំនាក់ទំនងរវាងគូស្នេហ៍។ ក្នុងនោះមានមនុស្សមួយចំនួនក៏ចូលចិត្តប្រើឧបករណ៍បន្ថែម ដើម្បីបង្កើនភាពសប្បាយរីករាយផងដែរ។
យ៉ាងណាមិញ ភាពរំភើបនៃការរួមភេទជាមួយការប្រើឧបករណ៍ជំនួយមួយចំនួន ប្រហែលជាមិនអាចធ្វើឱ្យដៃគូរបស់អ្នកសប្បាយចិត្តដូចដែលអ្នកគិតនោះទេ ប៉ុន្តែផ្ទុយទៅវិញវាក៏អាចបង្កគ្រោះថ្នាក់ដល់ដៃគូម្ខាងទៀតបាន។
តើភ្នែកពពែជាអ្វី? ភ្នែកពពែ ឬ គេហៅបានម្យ៉ាងទៀតថា ចិញ្ចៀនលិង្គ វាគឺជាឧបករណ៍ផ្លូវភេទមួយប្រភេទ ដែលមានសណ្ឋានជាកងរង្វង់មូល និង មានសក់ ឬ រោមល្អិតៗភ្ជាប់ជុំវិញវា ដោយគេពាក់វានៅជុំវិញ-កលិង្គអំឡុងពេលរួមភេទ។ វាត្រូវបានគេជឿថាជួយបង្កើនអារម្មណ៍ចំពោះស្ត្រីអំឡុងពេលរួមភេទ ដោយសារតែរោម ឬ សក់ដែលនៅភ្ជាប់ជុំវិញនោះបានរំញោចផ្ទៃជញ្ជាំងទ្វារមាស។
មូលហេតុត្រូវបានគេហៅថា ភ្នែកពពែ ព្រោះនៅសម័យដើម វាត្រូវបានគេធ្វើឡើងពីភ្នែកពពែ ដោយគេយករោមភ្នែកជុំវិញវាកាត់ និង ហាលស្ងួត ហើយពេលគេចង់ប្រើគឺត្រូវត្រាំទឹកឱ្យទន់។ បច្ចុប្បន្ននេះវាត្រូវបានគេផលិតពីកៅស៊ូស៊ីលីកូន និង មានដុំតូចៗទន់ៗដុះជាប់ជុំវិញ។
ការប្រើភ្នែកពពែ ឬ ចិញ្ចៀនលិង្គ ពេលកំពុងរួមភេទ អាចបង្កគ្រោះថ្នាក់ដែលមនុស្សជាច្រើនមិនដឹង ទោះបីជាវាធ្វើឱ្យការរួមភេទអាចមានអារម្មណ៍ល្អ និង ស្រួលក៏ដោយ។ តាមការបង្ហាញបានឱ្យដឹងថា រោមជុំវិញភ្នែកពពែ នឹងកោសជញ្ជាំងទ្វារមាសដៃគូបណ្តាលឱ្យមានរបួស អាចឱ្យរលាក និង ឆ្លងមេរោគបាន។ លើសពីនេះទៀត ប្រសិនបើឧបករណ៍នេះរអិលចូលទៅក្នុងទ្វារមាស វាក៏អាចបណ្តាលឱ្យរលាក និង ឆ្លងមេរោគកាន់តែខ្លាំង រហូតដល់ធុំក្លិនមិនល្អ។
ជាក់ស្តែង នារីអាយុ ១៩ ឆ្នាំម្នាក់ មានទឹករំអិលទ្វារមាសរយៈពេល ២ សប្តាហ៍ដោយមានក្លិនស្អុយ ហើយនាងបានទៅជួបគ្រូពេទ្យ និង បានពិនិត្យរកឃើញសំណល់ភ្នែកពពែ នៅក្នុងទ្វារមាសរបស់នាងដែលរលួយ និង បង្កជាខ្ទុះក្នុងទ្វារមាស បើមិនបានព្យាបាលទាន់ពេលទេ វាអាចរាលដាល និង បង្កជាការឆ្លងមេរោគក្នុងឈាម។
ក្រោយបានដឹងពីគុណវិបត្តិនៃភ្នែកពពែហើយ ដូច្នេះអ្នកគួរចៀសវាងការប្រើឧបករណ៍នេះ។ យ៉ាងណាមិញ ប្រសិនបើអ្នកចង់ប្រើឧបករណ៍បន្ថែម ឬ របស់លេងណាមួយដើម្បីឱ្យការរួមភេទអ្នកកាន់តែរំភើប អ្នកគួរប្រាប់ដៃគូជាមុន នោះការរួមភេទនឹងក្លាយជាបទពិសោធដ៏រីករាយសម្រាប់ភាគីទាំងពីរ តែកុំបង្កទុក្ខដល់ភាគីណាមួយនៅពេលក្រោយ៕
ប្រភព ៖ Kapook
