កាលពីថ្ងៃទី ២៥ ខែសីហា ឆ្នាំ ២០២៥ កន្លងទៅនេះ នាយកដ្ឋានប្រឆាំងបទល្មើសបច្ចេកវិទ្យារបស់ថៃ បានចុះទៅបង្រ្កាបចាប់ក្មេងប្រុសជំទង់ចំនួន ៣ នាក់ ដែលបានបែកគំនិតបើកវេបសាយល្បែងអនឡាយ រកលុយបានរាប់លានបាតក្នុងមួយខែៗ។
តាមព័ត៌មានបានឱ្យដឹងថា ការបង្រ្កាបនេះបានធ្វើឡើងនៅក្នុងខុនដូរប្រណីតមួយកន្លែងនាតំបន់ Rangsit និងផ្ទះមួយកន្លែងទៀតក្នុងតំបន់ Don Muang។ ប៉ូលិសបានរកឃើញថា ក្មេងប្រុសទាំង ៣ នាក់នេះ បានបង្កើត និង គ្រប់គ្រងវេបសាយល្បែងអនឡាយមួយឈ្មោះថា Meeruay99 ដែលមានអ្នកលេងជាង ៦ ម៉ឺននាក់ ហើយរកចំណូលបានជាង ១៤ លានបាតក្នុងមួយខែ។ លើសពីនេះទៅទៀត ប៉ូលិសក៏រកឃើញថា ពួកគេគ្រប់គ្រងវេបសាយចំនួន ២ ទៀត គឺ tnt69.com និង m.sagame123.com ដែលបានដំណើរការអស់រយៈពេលជិត ២ ឆ្នាំទៅហើយ។
យ៉ាងណាមិញ តាមព័ត៌មានបានឱ្យដឹងថា ក្មេងប្រុសទាំង ៣ នាក់នេះ ជាមិត្តភក្តិនឹងគ្នា ហើយតែងតែជុំគ្នាលេងហ្គេមជាប្រចាំ យូរៗទៅពួកគេក៏បានបែកគំនិតរកស៊ីល្បែងអនឡាញ ដោយរួមដៃគ្នាសរសេរកម្មវិធី បង្កើតវេបសាយ និងគ្រប់គ្រងវេបសាយ ព្រមទាំងបង្កើតគណនីធនាគារខុសច្បាប់ ដើម្បីទុកលុយដែលរកបានពីវេបសាយនោះ។ ដោយឡែក ប៉ូលិសបានរឹបអូសយកភស្តុតាង ហើយបានឃាត់ខ្លួនអ្នកទាំង ៣ នាក់នេះទៅស៊ើបអង្កេតបន្តទៀត៕
ប្រភព៖ Khaosod
