នៅវេលាម៉ោងប្រមាណ ៨:៣០ នាទីយប់ ថ្ងៃទី ២៥ ខែមិថុនា ឆ្នាំ ២០២៥ កម្លាំងនាយកដ្ឋានប្រឆាំងការជួញដូរមនុស្ស និង ការពារអនីតិជន នៃអគ្គស្នងការដ្ឋាននគរបាលជាតិ បានចុះឆ្មក់បង្ក្រាបទីតាំងភោជនីយដ្ឋានដែលមានយីហោ «ចំការស្នេហ៍» ស្ថិតតាមបណ្ដោយផ្លូវបេតុង ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពព័ត៌មានបានឱ្យដឹងថា ប្រតិបត្តិការចុះឆ្មក់បង្ក្រាបទីតាំងខាងលើនេះ ធ្វើឡើងពាក់ព័ន្ធការជួញដូរផ្លូវភេទ ដោយឃាត់បានមនុស្សប្រុសស្រីជាច្រើននាក់ រួមមានមេការ និង បុគ្គលិកប្រុសស្រីចំនួន ៣៧ នាក់ ដែលនៅក្នុងនោះមានជនសង្ស័យ ចំនួន ០៤ នាក់ ពាក់ព័ន្ធនឹងការជួញដូរផ្លូវភេទ ជនរងគ្រោះមានចំនួន ២៧ នាក់ជានីតិជន និង ចំនួន ០៦ នាក់ជាអនីតិជន។
ក្រោយប្រតិបត្តិការចុះឆ្មក់បង្ក្រាបនេះ ជនសង្ស័យ និង ជនរងគ្រោះដែលជាអនីតិជន ត្រូវបានបញ្ជូនទៅនាយកដ្ឋានប្រឆាំងការជួញដូរមនុស្ស និង ការពារអនីតិជន នៃអគ្គស្នងការដ្ឋាននគរបាលជាតិ ដើម្បីសាកសួរ៕
រូបភាព ៖ Fresh News Night
