ចំពោះតារាចម្រៀងស្រី ពេជ្រ សូលីកា មួយរយៈក្រោយនេះ មហាជនសុទ្ធសឹងតែជ្រាបពីការងារសិល្បៈរបស់នាង កំពុងក្ដោបបានប្រជាប្រិយភាពកាន់តែខ្លាំង និង មានសន្ទុះទីផ្សារហក់ឡើងមិនធម្មតា ដែលតែងឃើញវត្តមានរបស់នាងចូលរួមកម្មវិធីប្រគំតន្រ្តីតូចធំហូរហែ ទាំង Pub, Club និង កម្មវិធីមង្គលផ្សេងៗ។
ចំពោះការក្ដោបបានទីផ្សារខ្លាំងនេះដែរ ក្រឡេកមើលស្នាដៃបទចម្រៀងរបស់អ្នកនាង ពេជ្រ សូលីកា កាន់តែឆក់បានការចាប់អារម្មណ៍គាំទ្រខ្លាំង ខណៈនាងបានបញ្ចេញស្នាដៃបទចម្រៀងថ្មីៗបន្តបន្ទាប់ សុទ្ធសឹងតែពេញនិយមផ្ទុះការគាំទ្រពេញចិត្ត ជាពិសេសបទចម្រៀងមនោសញ្ចេតនា ស្នេហា កម្សត់ឈឺចាប់ ចាក់ដោតអារម្មណ៍អ្នកគាំទ្រជាច្រើនចូលចិត្តស្ដាប់។
ជាក់ស្ដែង ថ្មីៗកន្លងទៅនេះ ពេជ្រ សូលីកា ក៏បានបញ្ចេញបទចម្រៀងថ្មីបែបមសញ្ចេតនា ស្នេហាឈឺចាប់មួយបទទៀត មានចំណងជើងថា «ក្រែងថាស្រឡាញ់» ដែលកំពុងផ្ទុះការចែករំលែកគាំទ្រខ្លាំងពីស្រទាប់យុវវ័យ ព្រមទាំងកំពុងរង់ចាំមើលការបកស្រាយដោយផ្ទាល់ពីតារាស្រីរូបនេះ តាមឆាកតន្រ្តីផ្សេងៗផងដែរ។
ដោយឡែក ស្របពេលទើបតែបញ្ចេញបទចម្រៀងថ្មីនេះដែរ អ្វីដែលធ្វើឱ្យមហាជនកំពុងចាប់អារម្មណ៍ភ្ញាក់ផ្អើលខ្លាំងនោះ ខណៈបានឃើញនាងបង្ហោះលើ Story ហ្វេសប៊ុកប្រកាសសុំលុបចោលកម្មវិធីទាំងអស់រយៈពេល ១ សិន ដើម្បីសម្រាកលម្ហែខួរក្បាល។ ក្នុងនោះ អ្នកនាង ពេជ្រ សូលីកា បានរៀបរាប់ថា ៖ «សុំ Cancel Event ទាំងអស់ ១ ខែសិន សុំលម្ហែខួរក្បាលបន្តិច រូបដែលត្រូវផុសឱ្យ Client នៅផុសធម្មតា»៕
