ខៀវ សានសាណា ទម្លាយក្ដីស្រមៃចង់ក្លាយជាម្ដាយបវរកញ្ញា រង់ចាំកូនស្រីគ្រប់អាយុជំរុញឱ្យចូលប្រកួត

និយាយពីកូនស្រីបណ្ដូលចិត្តរបស់ពិធីការិនីល្បីឈ្មោះអ្នកនាង ខៀវ សានសាណា ដែលជាតំណក់ឈាមជាមួយស្វាមីមុន និង បានយកមករួមរស់ជាមួយមើលថែ ផ្ដល់ភាពកក់ក្ដៅឱ្យរូបគេយ៉ាងពេញទំហឹងនោះ មកទល់បច្ចុប្បន្ន កូនស្រីរបស់អ្នកនាងមានអាយុ ១២ ឆ្នាំហើយ ដែលកាន់តែធំពេញវ័យ មុខមាត់នាងតូចក៏កាន់តែស្រស់សោភា ព្រោះនាងមានឈាមជ័រជាកូនកាត់ខ្មែរ-បរទេស ធ្វើឱ្យមហាជនអ្នកគាំទ្រសរសើរពីទម្រង់មុខមាត់ ពណ៌សម្បុរដ៏ល្អផូរផង់របស់នាងតូច។

យ៉ាងណាមិញ ជារឿយៗក៏តែងឃើញអ្នកម៉ាក់រូបស្រស់នេះ បង្ហោះបង្ហាញពីសកម្មភាពកូនស្រីលើបណ្ដាញសង្គមពីរូបសម្រស់ និង បង្ហាញពីការមើលថែកូនស្រីយ៉ាងយកចិត្តទុកដាក់។

ជាក់ស្ដែង មួយរយៈថ្មីនេះ អ្វីកាន់តែចាប់អារម្មណ៍ទៀតចំពោះកូនស្រីជាទីស្រឡាញ់របស់ពិធីការិនីល្បីឈ្មោះរូបនេះ ដែលតែងឃើញអ្នកនាងបង្ហោះរូបភាពជាហូរហែ ខណៈបណ្ដើរកូនស្រីទៅណាមកណា ឬចូលរួមកម្មវិធីផ្សេងៗជាមួយគ្នាក្នុងឈុតសម្លៀកបំពាក់ដ៏ស្រស់ស្អាត មើលទៅកូនស្រីរបស់កាន់តែស្អាតប្លែកពេញក្រមុំស្ដូកផងដែរ។

ដោយឡែក ស្របពេលកូនស្រីកាន់តែលូតលាស់ធំពេញរូបពេញរាងស្អាតខ្លាំង ថ្មីៗកន្លងទៅនេះ ក៏បានឃើញអ្នកនាង ខៀវ សានសាណា និយាយក្នុងកិច្ចសម្ភាសមួយបង្ហាញពីបំណងរបស់ខ្លួនចំពោះកូនស្រី ដែលរង់ចាំនាងមានវ័យ ១៨ ឆ្នាំភ្លាម ពិធីការិនីរូបនេះនឹងជំរុញឱ្យកូនស្រីបណ្ដូលចិត្តចូលប្រឡូកវិស័យបវរកញ្ញាប្រកួតក្នុងកម្មវិធីណាមួយ ព្រោះអ្នកនាងមានក្ដីស្រមៃចង់ក្លាយជាម្ដាយរបស់បវរកញ្ញាអន្តរជាតិមួយរូបទៀតផង៕

សូមទស្សនាវីដេអូខាងក្រោម៖