លោក ខួច ខេវិន បង្ហាញអារម្មណ៍ត្រង់ៗទៅកាន់ មាស សុខសោភា ក្រោយទទួលដំណឹងបែកបាក់ស្វាមី និង ជំនឿ

កាលពីថ្ងៃទី ០៨ ខែឧសភា ឆ្នាំ ២០២៥ កន្លងទៅនេះ មហាជនអ្នកលេងបណ្តាញសង្គមហ្វេសប៊ុក ជាពិសេសអ្នកគាំទ្រតារាចម្រៀង មាស សុខសោភា មានការភ្ញាក់ផ្អើលយ៉ាងខ្លាំង ក្រោយពីបានដឹងដំណឹងនៃការបែកបាក់គ្នារវាងនាង និង ស្វាមី គឺលោក អ៊ិត រ៉ាដា តាមរយៈការឡាយវីដេអូប្រមាណជា ១ ម៉ោងកន្លះ នៅលើផេកហ្វេសប៊ុកផ្លូវការរបស់នាង។

ក្រោយទទួលដំណឹងខាងលើនេះ មហាជនជាច្រើនបានបញ្ចេញមតិរៀងៗខ្លួន ដោយភាគច្រើនបានសម្ដែងការសោកស្ដាយ និង លើកទឹកចិត្តដល់អ្នកនាងចំពោះរឿងរ៉ាវដែលបានកើតឡើង។ ដោយឡែក ក្នុងនោះក៏មានមហាជនមួយចំនួនបានប្រតិកម្មរិះគន់ ក៏ដូចជាស្ដីបន្ទោសដល់អ្នកនាង មាស សុខសោភា ដែរ ដោយលើកឡើងពាក់ព័ន្ធនឹងរឿងរ៉ាវជំនឿរបស់នាង។

យ៉ាងណាមិញ ក្រឡេកទៅមើលរៀមច្បង និង ជាអ្នកផលិតកម្មវិធីដ៏ល្បី លោក គួច ខេវិន ក៏បានបង្ហោះសំណេរយ៉ាងវែងអន្លាយ រៀបរាប់ពីអារម្មណ៍ទៅកាន់អ្នកនាង មាស សុខសោភា និង ស្វាមី ផងដែរ។ ជាពិសេសក្នុងសំណេរនោះ លោក គួច ខេវិន ក៏បានលើកឡើងពាក់ព័ន្ធនឹងជំនឿខ្លះៗថែមទៀត។

សំណេរលម្អិត លោក គួច ខេវិន បានរៀបរាប់ថា ៖ «ផ្ញើជូនប្អូនស្រី មាស សុខសោភា ជាទីស្រឡាញ់រាប់អានយ៉ាងជ្រាលជ្រៅបំផុត! បើទោះណាជាយើងមិនបានកើតមករួមផ្ទៃម្តាយតែមួយ ប៉ុន្តែការរាប់អាន យល់ចិត្តថ្លើម រួមការងារក្នុងអាជីពជាអ្នកសិល្បៈជាច្រើនឆ្នាំ ការប្រាស្រ័យទាក់ទងគ្នាក្នុងសកម្មភាពសង្គមជាញឹកញាប់ វាបានបង្កើតឡើងនូវមនោសញ្ចេតនា ស្រឡាញ់រាប់អានគ្នាដូចបងដូចប្អូនបង្កើតរវាងយើងទាំងពីរ រួមទាំងស្វាមីរបស់ប្អូនផង។ ខណៈដែល បងបានឃើញប្អូន ដែលមានសភាពមិនដូចគ្រាមុន និង ស្ថិតក្នុងស្ថានភាពប្រឈមទៅនឹងការបាក់បែកទ្រនំសុភមង្គលនៃប្តីប្រពន្ធ ដែលធ្លាប់តែរឹងមាំ និង ផ្អែមល្ហែមគួរឱ្យកោតសសើរនោះ បងហាក់មានអារម្មណ៍ស្រណោះស្រណោកសោកសង្រេងក្នុងចិត្តមិនគិតស្មានដល់? និង សែនអាណិតឥតឧបមាចំពោះប្អូន និង ស្វាមី។

បងសូមនិយាយជាមួយ និង ចំពោះប្អូនថា «ជំនឿគឺជាសេរីភាពនៃគំនិត» តែទោះជាយ៉ាងណា «ជំនឿក៏មានព្រំដែនកំណត់» ដែលវាមិនត្រូវរំលោភ ឬ ប៉ៈពាល់ទៅដល់សភាវគតិណាមួយផ្សេងទៀត។ មនុស្សដែលជឿទៅលើសភាវៈក្រៅខ្លួនដោយសារតែបាត់បង់នូវជំនឿលើខ្លួនឯង ជំនឿគួរមានព្រំដែន ដែលកំណត់ដោយគំនិត មានហេតុបច្ច័យ និង ផលត្រឹមត្រូវប្រកបដោយសច្ចភាព។ ជំនឿស៊ប់ មិនមែនជំនឿងប់នោះឡើយ ហើយបងយល់ថាសម្រាប់ប្អូន ដែលតែងតែក្លាហាន រឹងមាំប្រកបដោយការតស៊ូកន្លងមក បងពុំចាំបាច់ផ្តល់នូវឧទាហរណ៍ណាមួយឡើយ ប៉ុន្តែបងចង់និទានរឿងមួយយ៉ាងខ្លី៖ មានប្រជាជាតិនៃអាណាចក្រមួយ គោរពប្រតិបត្តិ និង មានជំនឿយ៉ាងងប់ងល់ទៅលើអាទិទេពរបស់ពួកគេ តែជារឿយៗនៃការទម្លាក់សព្វាវុធ និង លៈបង់គ្រប់កិច្ចការងារចោល ដើម្បីប្រតិបត្តិជំនឿដោយលត់ក្រាបសំពះអាទិទេព សត្រូវរបស់ពួកគេក៏រមែងលើកទ័ពមកកំទេចពួកគេដែរ ជាចុងក្រោយ ជំនឿរបស់ពួកគេនៅតែមាន ប៉ុន្តែប្រជាជាតិ និង ទឹកដីរបស់ពួកគេបានរលាយបាត់ទៅហើយ ពួកគេសល់ត្រឹមតែជាជនជាតិភាគតិច នៃនរគមួយផ្សេងប៉ុណ្ណោះ។

សូមប្អូនស្រី និង ស្វាមីកុំនឿយណាយនឹងការគិតពិចារណា ដើម្បីជីវិតដែលរង់ចាំផ្តល់ពន្លឺត្រចះត្រចង់ចំពោះប្អូនៗ ! ដោយក្តីស្រឡាញ់ដ៏ជ្រាលជ្រៅបំផុតពីបង គួច ខេវិន Bong love you Two»៕