នៅថ្ងៃទី ២៥ ខែកក្កដា ឆ្នាំ ២០២៥ នេះ ខាងកងទ័ពភូមិន្ទរបស់ថៃ បានចេញសេចក្តីថ្លែងការណ៍សរុបពីស្ថានការណ៍សង្រ្គាមនៅតាមជាយដែនកម្ពុជា-ថៃ តែនៅឆ្លៀតបោះសម្តីឱ្យកម្ពុជាថាឱ្យឈប់ចង់បានទឹកដីខ្លួន ឈប់ប្តឹងទៅកាន់តុលាការអន្តរជាតិ ហើយត្រឡប់មកចរចាគ្នាក្នុងឋានៈប្រទេសជាមិត្តវិញ។
កងទ័ពភូមិន្ទថៃ ដែលតំណាងឱ្យកងទ័ពភូមិភាគ ២ បានឱ្យដឹងថា ខ្លួនមានបំណងការពារអធិបតេយ្យភាពរបស់ថៃពីការឈ្លានពានរបស់កម្ពុជា ក្រោមច្បាប់អន្តរជាតិយ៉ាងពិត មិនមែនជាការរំលោភបំពានដូចដែលកម្ពុជាបានអះអាង ហើយព្យាយាមបំភ្លៃព័ត៌មាន ដើម្បីការអាណិតអាសូរពីសហគមន៍អន្តរជាតិនោះទេ។
កងទ័ពភូមិន្ទថៃ បានអំពាវនាវដល់កម្ពុជាឱ្យបញ្ឈប់សកម្មភាពរបស់ខ្លួន ដែលមានបំណងចង់កាន់កាប់តំបន់ក្នុងទឹកដីរបស់ប្រទេសថៃ ដោយការយកបញ្ហានោះទៅកាន់តុលាការយុត្តិធម៌អន្តរជាតិ ហើយត្រឡប់មកតុចរចាវិញ ក្នុងឋានៈជាប្រទេសជាមិត្ត៕
ប្រភព៖ Khaosod
