ទ្រង់ទ្រាយធំ! ថៃ រឹបអូសបានគ្រឿងញៀន ៣០ បាវ និង ម៉ាទឹកកក ៦៤ គីឡូក្រាម ពីក្រុមជួញដូរថ្នាំញៀននៅព្រំដែនមីយ៉ាន់ម៉ា​

កាលពីថ្ងៃទី ២ ខែកក្កដា ឆ្នាំ ២០២៥ កន្លងទៅ ក្រុមកងកម្លាំងនៅប្រទេសថៃ បានបង្រ្កាបការជួញដូរគ្រឿងញៀនទ្រង់ទ្រាយធំមួយករណីទៀតហើយ ដោយរឹបអូសបានគ្រឿងញៀនប្រភេទគ្រាប់ចំនួន ៦ លានគ្រាប់ និង ប្រភេទម៉់ាទឹកកកចំនួន ៦៤ គីឡូក្រាម។

ការបង្រ្កាបនេះ បានកើតឡើងកាលពីព្រឹកម៉ោង ៧ និង ១៥ នាទី នាថ្ងៃទី ២ ខែកក្កដា ឆ្នាំ ២០២៥ កន្លងទៅ នៅជិតទីតាំងបញ្ចុះសព Ban Pa Sang Na Ngoen ឃុំ Mae Fah Luang ស្រុក Mae Fah Luang ខេត្ត Chiang Rai នៅជាប់ព្រំដែនប្រទេសមីយ៉ាន់ម៉ា។ ក្នុងនោះ កងកម្លាំងដែលបានធ្វើសកម្មភាពបង្រ្កាបមានកងកម្លាំង Pha Muang កងកម្លាំងពិសេសកងទ័ពជើងគោក កងទ័ពសេះទី២ និង NPPO ដោយកងកម្លាំងបានប្រទះឃើញជនសង្ស័យចំនួន ៣០ នាក់ បាននាំគ្នាដឹកជញ្ជូនបាវដាក់លើឡាន ហើយខាងកងកម្លាំងក៏បានសុំឆែកឆេរ តែខាងក្រុមជនសង្ស័យក៏បានផ្ទុះអាវុធមកកាន់ក្រុមកងកម្លាំង បណ្តាលឱ្យមានការតស៊ូគ្នាចំនួន ១០ នាទី ចុងក្រោយខាងជនសង្ស័យស្លាប់អស់ ២ នាក់ សល់ប៉ុន្មានទៀតក៏នាំគ្នារត់គេចអស់ រីឯក្រុមកងកម្លាំងមានសុវត្ថិភាពទាំងអស់។

យ៉ាងណាមិញ ក្នុងនោះកងកម្លាំងបានដកហូតវត្ថុតាងដូចជា ថ្នាំញៀនមេតំហ្វេតាមីនចំនួន ៣០ បាវ ប្រមាណជា ៦លានគ្រាប់ មេតំហ្វេតាមីន (ice)ចំនួន ២ បាវ ទម្ងន់សរុប ៦៤ គីឡូក្រាម កាំភ្លើងខ្លី ១ ដើម គ្រាប់បែកដៃ ១គ្រាប់ វិទ្យុទាក់ទងចំនួន ២ គ្រឿង ព្រមទាំងសំបកគ្រាប់កាំភ្លើង AK47 ជាច្រើនគ្រាប់។ ចុងក្រោយ កងកម្លាំងបានប្រគល់ភស្តុតាងទាំងនេះឱ្យទៅមេប៉ុស្តិ៍នគរបាល Mae Fah Luang ដើម្បីធ្វើការចាត់ចែងទៅតាមផ្លូវច្បាប់៕

ប្រភព៖ AMARINTV