កាលពីថ្ងៃទី ២៨ ខែកក្កដា ឆ្នាំ ២០២៥ កន្លងទៅ នាយកដ្ឋានបង្ការ និង កាត់បន្ថយគ្រោះមហន្តរាយរបស់ថៃ បានរាយការណ៍ពីស្ថានការណ៍ទឹកជំនន់ក្នុងប្រទេសថៃ ក្រោយពីទទួលឥទិ្ធពលវាយប្រហារពីព្យុះវិភា តាំងពីថ្ងៃទី ២១ ខែកក្កដា ឆ្នាំ ២០២៥ កន្លងទៅ។
ក្នុងនោះ មានខេត្តចំនួន ៥ ដែលមានទឹកជំនន់ធ្ងន់ធ្ងរ គឺមានដូចជា ខេត្តណាន ខេត្តឈៀងរ៉ៃ ខេត្តព្រែ ខេត្តសុខោទ័យ និង ខេត្តតាក ដែលកន្លែងប៉ះពាល់មានសរុបមានចំនួន ២៤ ស្រុក ១១៥ ឃុំ និង ៤៦១ ឃុំ។ ចំណែកប្រជាជនដែលទទួលរងផលប៉ះពាល់មានចំនួន ២៤ ៥០៥ គ្រួសារ សរុប ៧៩ ៩៤២ នាក់។ ដោយឡែក ស្ថានការណ៍ទឹកជំនន់នៅខេត្តណាន ខេត្តឈៀងរ៉ៃ និង ខេត្តព្រែ កំពុងតែអន់ថយ តែខេត្តសុខោទ័យ និង ខេត្តតាក កំពុងតែកើនឡើងខ្លាំង។
យ៉ាងណាមិញ នាយកដ្ឋានបង្ការ និង កាត់បន្ថយគ្រោះមហន្តរាយរបស់ថៃ បានចុះអន្តរាគមន៍ ដោយសហការជាមួយអាជ្ញាធរក្នុងតំបន់ ដើម្បីជួយដល់ប្រជាជនដែលរងផលប៉ះពាល់ទាំងអស់ ទាំងការជួយជម្លៀស ការផ្គត់ផ្គង់ និង ការរក្សាសុវត្ថិភាព៕
ប្រភព៖ Bangkokbiz
