និយាយពីតារាស្រីរូបស្រស់ ហ្វីយ៉ាតា ថ្មីៗកន្លងទៅនេះ បានធ្វើឱ្យមហាជនអ្នកគាំទ្រចាប់អារម្មណ៍រំភើប និង បង្ហាញការគាំទ្រខ្លាំង ក្រោយពីនាងសម្រេចចិត្តប្រឡូកលើវិស័យបវរកញ្ញាលើកដំបូង ដែលនាងបានបង្ហាញវត្តមានជាបេក្ខភាពផ្លូវការរបស់កម្មវិធី Miss Universe Cambodia 2025។
ចំពោះការប្រឡូកវិស័យបវរកញ្ញានេះដែរ កន្លងមក តារាស្រី ហ្វីយ៉ាតា ទទួលបានការជំរុញលើកទឹកចិត្តខ្លាំងពីអ្នកគាំទ្រជាច្រើន ដែលមើលឃើញពីសមត្ថភាពរបស់នាង ទាំងរូបសម្រស់ ទេពកោសល្យ និង ចំណេះដឹង ដែលស័ក្តិសមជាបវរកញ្ញាតំណាងកម្ពុជាក្នុងកម្មវិធីណាមួយប្រកួតលើឆាកអន្តរជាតិទៀតផង។
ដោយឡែក ក្រោយពីក្លាយជាបេក្ខភាពក្នុងកម្មវិធី Miss Universe Cambodia 2025 មកដល់ថ្ងៃទី ២៥ ខែឧសភា ឆ្នាំ ២០២៥ កន្លងទៅ ក្នុងកម្មពិធីបំពាក់ឆៀង និង បង្ហាញបេក្ខភាពផ្លូវការនៃកម្មវិធី ឃើញថាតារាស្រីរូបនេះ បានដើរបង្ហាញខ្លួនយ៉ាងជឿជាក់ លេចធ្លោ ក្នុងចំណោមបេក្ខភាពជើងខ្លាំងជាច្រើនរូបទៀត។
ខណៈជួបសុទ្ធតែបេក្ខភាពជើងខ្លាំងក្នុងកងប្រកួតនេះដែរ ក្នុងនាមជាបេក្ខភាពបវរកញ្ញា MUC 2025 មួយរូប អ្នកនាង ហ្វីយ៉ាងតា ក៏បានបង្ហាញឆន្ទៈ ក៏ដូចជាការតាំងចិត្តល្អៗយ៉ាងពេញចិត្ត ដោយចាត់ទុកគូប្រកួតមិនមែនជាគូសត្រូវ ព្រោះខំស៊ូធ្វើសុទ្ធតែដើម្បីប្រទេស ដែលរួមគ្នាបើកទ្វារប្រទេសទៅកាន់ឆាកអន្តរជាតិ។
ក្នុងនោះ អ្នកនាង ហ្វីយ៉ាតា បានបង្ហោះរៀបរាប់ថា ៖ «វែងតិច តែចង់ឱ្យអាន គូប្រកួតប្រជែង តែមិនមែនគូសត្រូវ ខ្ញុំនឹងធ្វើគ្រប់ campaigns ឱ្យអស់ពីកម្លាំងកាយចិត្ត.. ក្នុងចំណោមពួកយើងទាំង 20 រូប អ្នកណាក៏បានឱ្យតែអាចតំណាងប្រទេសទៅ International លុបបំបាត់នៅចំណុចដែលខ្វះខាត និង ជួយបំពេញតាម category ដែល Miss Universe woman should have. ដើម្បីឱ្យ the world មើលមកយើងក្នុងក្រសែភ្នែកថ្មីថា នារីកម្ពុជា អាចធ្វើបានគ្រប់យ៉ាងឆ្លើយតបទៅនឹងអ្វីដែលចក្រវាលហុចមក ដោយមិនរារែក.. ហើយជួយបើកទ្វារពន្លឺថ្មីនៃ ចក្រវាល international បាន.. ពួកយើងជាខ្មែរទាំងអស់គ្នា ប្រាកដណាស់ នឹងចាំទះដៃសាទររួមគ្នា. ព្រោះគ្រប់យ៉ាងគឺដើម្បីកម្ពុជា និង អនាគតថ្មីរបស់យើង។
វិស័យបវកញ្ញាថ្មីសម្រាប់ខ្ញុំ តែការប្រយុទ្ធដើម្បីក្ដីស្រមៃក្នុងជីវិត មិនមែនជារឿងថ្មីសម្រាប់ខ្ញុំទេ ព្រោះខ្ញុំឈរនៅទីនេះបាន គឺខ្ញុំសាងឡើងពី កំហុស ការកែប្រែ ក្ដីទុក្ខ ក្ដីសុខ បរាជ័យ ជោគជ័យ មិនថារឿងការងារ រកស៊ី ឬ ការរស់នៅ.. មេរៀនជាច្រើនទំព័រនោះ ខ្ញុំជាគ្រូ រួចក៏ជាសិស្សខ្លួនឯងដូចគ្នា ចឹងគ្មានអ្វីដែលខ្ញុំធ្វើមិនបានទេ.. អរគុណការស្រឡាញ់ដែលផ្ដល់មកខ្ញុំ។ អរគុណគ្រប់គ្នាដែលមានចំណែកក្នុង Journey របស់ខ្ញុំមួយនេះ ..»៕
