រយៈពេល ២ ថ្ងៃ ក្រុមសប្បុរសធម៌ ហេង វិសាល និង ស្រីនា ខ្នះខ្នែងដឹកស្បៀងជាង ៥០០ តោនជូនជនភៀសសឹក និង កំពុងបន្តប្រមូលបន្ថែមទៀត

កាលពីយប់ថ្ងៃទី ២៨ ខែកក្កដា ឆ្នាំ ២០២៥ វេលាម៉ោង ២៤:០០ បទឈប់បាញ់ដោយគ្មានលក្ខខណ្ឌរវាងកម្ពុជា-ថៃ បានចូលជាធរមានហើយ។ យ៉ាងណាមិញ ក្រឡេកទៅមើលស្ថានភាពជនភៀសសឹកឯណោះវិញ ក៏មិនទាន់បានវិលត្រឡប់ទៅកាន់ស្រុកភូមិកំណើតវិញនោះទេ។

ជាការពិតណាស់ បើទោះជាបទឈប់បាញ់ដោយគ្មានលក្ខខណ្ឌរវាងកម្ពុជា-ថៃ បានចូលជាធរមានក្តី ប៉ុន្តែមហាជនសប្បុរសធម៌ នៅតែបន្តក្នុងការប្រមូលយកថវិកា ស្បៀងអាហារ និង សម្ភារប្រើប្រាស់សំខាន់ៗជូនដល់កងកម្លាំង និង ជនភៀសសឹកបន្តនៅឡើយ។

ងាកមកក្រុមគ្រួសាររបស់ Influencer ល្បីឈ្មោះ លោក ហេង វិសាល និង អ្នកនាង ជា ស្រីនា ឯណោះវិញបានបន្តដុតដៃ ដុតជើងក្នុងការប្រមូល រៀបចំ និង ដឹកជញ្ជូនស្បៀង ដែលទទួលបានពីសប្បុរសជនគ្រប់ទិសទី ដើម្បីជូនទៅដល់ជនភៀសសឹកយ៉ាងសកម្ម។ ក្នុងនោះ ក៏មានការចូលរួមពី Influencer សិល្បករ សិល្បការិនី និង បងប្អូនខ្មែរ និង អន្តរជាតិចូលរួមជួយគ្នាផងដែរ។

តាមរយៈការឱ្យដឹងពីលោក ហេង វិសាល បានបង្ហោះលើហ្វេសប៊ុកកាលពីថ្ងៃទី ២៨ ខែកក្កដា ឆ្នាំ ២០២៥ ថា រយៈពេល ២ ថ្ងៃមកនេះ លោកបានផ្តល់ស្បៀង និង សម្ភារប្រើប្រាស់ ថ្នាំសង្កូវសរុបចូលគ្នាគឺ ជាង ៥០០ តោន ដល់បងប្អូនជនភៀសសឹក និង កងកម្លាំងជួរមុខនៅខាងព្រះវិហារ, ពោធិ៍សាត់, សៀមរាប, ឧត្តរមានជ័យ, បន្ទាយមានជ័យ និង បាត់ដំបង ផងដែរ៕