ពិតមែនទៅ មនុស្សស្រីមិនពិបាកក្នុងការស្គាល់ចិត្តនោះទេ ហើយបើបុរសអាចដឹងពីការពិតខ្លះៗរបស់ពួកគេ ធានាថា មិនថាមនុស្សស្រីបែបណា លំដាប់ណា ដឹងតែបាក់ចិត្ត ផ្ញើជីវិតលើអ្នកតែម្តង។ តួយ៉ាង តាមរយៈទំព័រហ្វេសប៊ុក ផ្នត់គំនិតសហគ្រិន មានការពិត ១០ យ៉ាង អំពីមនុស្សស្រី ដែលបុរសគួរយល់ដឹង។
១. មនុស្សស្រីទាក់ទាញចិត្តនឹងបុរសដែលមានអនាម័យល្អ មានរបៀបរៀបរយ និង មានមន្តស្នេហ៍
មនុស្សស្រីតែងកត់សម្គាល់ពីរូបរាងខាងក្រៅមុនគេ។ បុរសដែលមានក្លិនខ្លួនល្អ សក់ស្អាត សម្លៀកបំពាក់រៀបរយ និង មានអាកប្បកិរិយាថ្លៃថ្នូរ អាចបង្កើតចំណាប់អារម្មណ៍ល្អតាំងពីដំបូង ដែលជាមូលដ្ឋានគ្រឹះនៃមន្តស្នេហ៍។
២. ពួកគេត្រូវការបង្អែករឹងមាំ ជាជាងបុរសដែលទន់ជ្រាយ ឬខ្សោយផ្លូវចិត្ត
មនុស្សស្រីចង់បានដៃគូ ដែលអាចធ្វើជាទីពឹងពាក់បាន មិនមែនជាមនុស្សដែលតែងតែស្ទាក់ស្ទើរ ឬគ្មានភាពក្លាហានក្នុងការសម្រេចចិត្តនោះទេ។ ភាពរឹងមាំក្នុងចិត្តគំនិត និង ការទទួលខុសត្រូវ គឺជាចំណុចសំខាន់ដែលពួកគេតែងរកមើល។
៣. មនុស្សស្រីចូលចិត្តឱ្យបុរសបង្ហាញអារម្មណ៍ពិតប្រាកដចំពោះពួកគេ
ការបង្ហាញអារម្មណ៍ដោយស្មោះត្រង់ មិនមែនជាភាពទន់ខ្សោយឡើយ តែវាបង្ហាញពីភាពជឿជាក់លើខ្លួនឯង និង ទុកចិត្តលើដៃគូ។ ពេលបុរសហ៊ានបង្ហាញក្ដីស្រឡាញ់ ក្ដីបារម្ភ ឬសូម្បីតែភាពងាយរងគ្រោះ នោះនឹងធ្វើឱ្យទំនាក់ទំនងកាន់តែស៊ីជម្រៅ។
៤. ពួកគេរីករាយនឹងសរសើរ និង ចូលចិត្តទទួលកាដូ
សរសើរដោយស្មោះត្រង់ចំពោះអ្វី ដែលមនុស្សស្រីបានប្រឹងប្រែងធ្វើ ឬចំពោះសម្រស់របស់ពួកគេ អាចធ្វើឱ្យពួកគេមានកម្លាំងចិត្ត និង មានអារម្មណ៍ថាត្រូវបានគេកោតសរសើរ។ ចំណែកកាដូវិញ មិនចាំបាច់មានតម្លៃថ្លៃពេកនោះទេ! គ្រាន់តែជាវត្ថុតំណាងនៃការយកចិត្តទុកដាក់ក៏គ្រប់គ្រាន់ដែរ។
៥. ពេលនៅក្បែរបុរស មនុស្សស្រីតែងយកចិត្តទុកដាក់លើគ្រប់ព័ត៌មានលម្អិតរបស់បុរស រាប់តាំងពី ស្លៀកពាក់ តុបតែងខ្លួន ជាពិសេសស្បែកជើង
មនុស្សស្រីមានភ្នែកគិតពីរឿងតូចតាច។ ពួកគេតែងសង្កេតមើលពីរបៀបដែលបុរសម្នាក់ស្លៀកពាក់ ស្ទីលសក់ ក្រចកដៃ ឬសូម្បីតែភាពស្អាតនៃស្បែកជើង។ ទាំងនេះបង្ហាញថាបុរសនោះយកចិត្តទុកដាក់លើខ្លួនឯង ដែលឆ្លុះបញ្ចាំងពីភាពគោរពខ្លួនឯង។
៦. នៅពេលជួបបញ្ហាលំបាកចិត្ត មនុស្សស្រីត្រូវការអ្នកដែលយល់ចិត្តស្តាប់ពួកគេ
ពេលមានបញ្ហា មនុស្សស្រីច្រើនតែចង់បញ្ចេញអារម្មណ៍របស់ពួកគេ។ ពួកគេមិនចាំបាច់ទាមទារដំណោះស្រាយភ្លាមៗនោះទេ! តែគ្រាន់តែត្រូវការអ្នកស្តាប់ដោយយកចិត្តទុកដាក់ និង យល់ពីអារម្មណ៍របស់ពួកគេ។ ស្តាប់ដោយក្តីអាណិតអាសូរគឺសំខាន់បំផុត។
៧. ក្នុងការពិភាក្សា ពួកគេត្រូវការដំបូន្មាន និងជួយសម្រេចចិត្ត
ទោះបីជាមនុស្សស្រីអាចគិតបានស៊ីជម្រៅក៏ដោយ ពេលខ្លះពួកគេនៅតែត្រូវការមតិយោបល់ពីបុរសដែលខ្លួនទុកចិត្ត ដើម្បីជួយថ្លឹងថ្លែងពីជម្រើសផ្សេងៗ និងសម្រេចចិត្តបានល្អប្រសើរ។ នេះបង្ហាញពីការសហការគ្នាក្នុងទំនាក់ទំនង។
៨. មនុស្សស្រីមិនអាចទ្រាំទ្របានឡើយ ប្រសិនបើមានអារម្មណ៍ថាបុរសលាក់បាំងអ្វីមួយពីពួកគេ ឬថាពួកគេគ្មានតម្លៃសម្រាប់បុរសនោះ
ភាពស្មោះត្រង់ និង ការទុកចិត្តជាមូលដ្ឋាននៃទំនាក់ទំនងមួយដ៏រឹងមាំ។ ប្រសិនបើមនុស្សស្រីមានអារម្មណ៍ថាបុរសលាក់លៀមអ្វីមួយ ឬមិនបានឱ្យតម្លៃលើពួកគេ នោះនឹងធ្វើឲ្យបាត់បង់ការទុកចិត្ត និង ប៉ះពាល់ដល់ទំនាក់ទំនងយ៉ាងធ្ងន់ធ្ងរ។
៩. ពួកគេមិនចូលចិត្តបុរសដែលយល់ព្រមតាមគ្រប់រឿងរបស់ពួកគេនោះទេ!
មនុស្សស្រីចង់បានបុរសដែលមានជំហរផ្ទាល់ខ្លួន និងហ៊ានបញ្ចេញមតិយោបល់ដោយស្ថាបនា។ យល់ព្រមតាមគ្រប់រឿងអាចធ្វើឲ្យមនុស្សស្រីគិតថាបុរសនោះគ្មានគំនិតផ្ទាល់ខ្លួន ឬមិនបានយកចិត្តទុកដាក់ពិតប្រាកដ។
១០. មនុស្សស្រីតែងតែគិតគូរពីខ្លួនឯងច្រើន
នេះមិនមែនមានន័យថាមនុស្សស្រីជាមនុស្សអាត្មានិយមនោះទេ! តែវាបង្ហាញពីភាពយកចិត្តទុកដាក់ចំពោះសុខភាព សម្រស់ អាជីព និង ការអភិវឌ្ឍន៍ខ្លួនឯង។ ពួកគេចង់ក្លាយជាមនុស្ស ដែលល្អប្រសើរជាងមុនសម្រាប់ខ្លួនឯង និងសម្រាប់អ្នកដែលខ្លួនស្រឡាញ់៕
