មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល និង ចែករំលែកបន្តគ្នាព្រោងព្រាតទុកជាមេរៀន បន្ទាប់ពីអ្នកម្ដាយមួយរូប បានចែករំលែកបទពិសោធ ដែលកូនតូច ត្រូវបានគ្រូពេទ្យរកឃើញឆ្លងមេរោគពីសាច់មាន់ បន្ទាប់ពីទទួលទានភ្លៅមាន់បំពងដែលទិញនៅតាមផ្លូវ។
ទាក់ទិនទៅនឹងរឿងដែលគួរប្រុងប្រយ័ត្ននេះ តាមរយៈប្រភពស្ត្រីជាម្ដាយដែលមានគណនីឈ្មោះ Jee Net បានបង្ហោះសារចែករំលែកនៅថ្ងៃទី ២៦ ខែមិថុនា ឆ្នាំ ២០២៥ នៅក្នុងគ្រុប ក្រុមគាំពារមាតានិងទារក ឱ្យបានដឹងថា ៖ «សារចែករំលែកសម្រាប់បងៗដែលមានកូនតូចដូចខ្ញុំ កូនខ្ញុំគាត់បានញ៉ាំភ្លៅមាន់បំពងដែលគេលក់តាមផ្លូវ ហើយរយៈពេលពីរថ្ងៃ គាត់ក៏ចេញក្រហមឆ្មេរតូចៗលើមុខ ស្អែកឡើងកើតរឹតតែធំ មានខ្ទុះ គាត់ប្រាប់ថារមាស់ហើយឈឺ»។
ស្ត្រីជាម្ដាយរូបនេះ បានបន្តឱ្យដឹងទៀតថា នៅពេលដែលខ្លួនបានយកកូនតូចដែលមានអាការៈខាងលើទៅដល់មន្ទីរពេទ្យ ត្រូវបានលោកគ្រូពេទ្យបញ្ជាក់ថា កូនស្រីបានឆ្លងមេរោគមកពីសាច់មាន់ដែលបានញ៉ាំនោះ ព្រោះមាន់នោះអាចឈឺ ទើបញ៉ាំទៅកើតបែបនេះ ដែលតម្រូវឱ្យបងប្អូនដែលជាមាតាមាតា អាណាព្យាបាលប្រុងប្រយ័ត្នទាំងអស់គ្នា៕
