អ្នកទៅសង្ក្រាន្តវត្តភ្នំគ្នាយើងត្រៀមៗ! ឆ្នាំនេះ មានតាំងបង្ហាញ «មង្កុដអប្សរា» ដ៏ធំនៅវត្តភ្នំ ប្រណីតអស្ចារ្យណាស់

កម្មវិធី «សង្ក្រាន្តវត្តភ្នំ» នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ នឹងប្រព្រឹត្តទៅនៅថ្ងៃទី ១៤, ១៥ និង ថ្ងៃទី ១៦ ខែមេសា ឆ្នាំ ២០២៥ ដោយភ្ជាប់ជាមួយផ្លូវថ្មើរជើង Walk Street ភ្នំពេញ ដោយបើកផ្លូវថ្មើរជើងបន្តដល់ទៅ ៥ ថ្ងៃ ដោយបន្ថែម ៣ ថ្ងៃនៃថ្ងៃចូលឆ្នាំខ្មែរ រហូតបញ្ចប់បុណ្យចូលឆ្នាំថ្មី។

កៀកនឹងកម្មវិធី សង្ក្រាន្តវត្តភ្នំ ខិតជិតមកដល់នេះផងដែរ នៅថ្ងៃទី ០៨ ខែមេសា ឆ្នាំ ២០២៥ នេះ មន្ទីរវប្បធម៌ និង វិចិត្រសិល្បៈរាជធានីភ្នំពេញ បានជូនដំណឹងពីពិធីសែនព្រេន ដើម្បីសុំដំឡើង «មង្កុដអប្សារាដ៏ធំ» ធ្វើឡើងនៅថ្ងៃទី ០៧ ខែមេសា ឆ្នាំ ២០២៥ ម្សិលមិញនេះ ដើម្បីយក «មង្កុដអប្សារាដ៏ធំ» យកទៅដំឡើងក្នុងព្រឹត្តិការណ៍ « សង្ក្រាន្តវត្តភ្នំ» ត្រង់ចំណុចរមណីយដ្ឋានវប្បធម៌ប្រវត្តិសាស្ត្រវត្តភ្នំ ខណៈដែលបច្ចុប្បន្នត្រូវបានដំឡើងរួចរាល់ ប្រកបទៅដោយភាពទាក់ទាញ ជាមួយនឹងរចនាបថដ៏ប្រណីតល្អល្អះ ដើម្បីតាំងបង្ហាញទៅដល់ភ្ញៀវជាតិ និង អន្តរជាតិ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ក្នុងពេលឆាប់ៗខាងមុខនេះ។

សូមបញ្ជាក់ផងដែរថា បើតាមការឱ្យដឹងពីរដ្ឋបាលរាជធានីភ្នំពេញ សង្ក្រាន្តវត្តភ្នំ ឆ្នាំ ២០២៥ នេះ មានកម្មវិធីសាសនាដូចជា ការតាំងពលិការ ពិធីស្រង់ព្រះពុទ្ធរូប ខណៈកម្មវិធីកម្សាន្តសប្បាយមានដូចជា ការសម្ដែងទស្សនីយភាពសិល្បៈរបាំបុរាណ របាំប្រពៃណី មានរបាំត្រុដិ ចាប៉ីដងវែង ល្ខោនយីកេរ ល្ខោនមហោរី ការលេងល្បែងប្រជាប្រិយដែលជាកេរ្តិ៍ដំណែលដូនតាខ្មែរយើង ការរាំកម្សាន្តសប្បាយគ្រប់ទម្រង់គ្រប់ចង្វាក់ភ្លេងយ៉ាងសប្បាយរីករាយ៕