ថៅកែហាងនំលំដាប់ដ៏ល្បី តាមពិតជាកូនខ្មែរម្នាក់នេះ វ័យក៏ក្មេងរូបក៏សង្ហា គំនិតរកស៊ីមិនធម្មតា

អ្នកចូលចិត្តនំប៉័ង និង នំខេកម៉ូដប្រណីតៗ ជាពិសេស អ្នកលំដាប់ខ្ពស់ ប្រាកដជាស្គាល់ច្បាស់នូវហាងនំ Three Bakery។ គំនិតរកស៊ីលើការលក់នំនេះ ត្រូវបានចាប់ផ្តើមនៅឆ្នាំ ២០២២ ដោយកូនខ្មែរវ័យក្មេងមួយរូបគឺ លោក Kunmealy Kunkar ឬត្រូវបានគេស្គាល់ឈ្មោះហៅក្រៅថា Billy។ ជាស្ថាបនិកនៃហាងនំ លោកមានឯកទេសទៅលើការបង្កើតនំប៉័ងច្នៃប្រឌិតថ្មីៗ(Fusion pastry), នំខេកក្នុងឱកាសពិសេសៗ និង នំអាពាហ៍ពិពាហ៍។

លោកបានចាប់ផ្តើមធ្វើនំតាំងពីនៅក្នុងផ្ទះបាយដ៏តូច ដែលអាចធ្វើនំសម្រាប់ភ្ញៀវម្តងបានតែ ៦ នាក់ រហូតអាចបើកជាហាងនៅទីតាំងសំខាន់ៗច្រើនកន្លែង ក្នុងនោះរួមមានទីតាំងនៅក្នុងតំបន់បឹងកេងកង និង ក្នុងផ្សារទំនើប ជីប ម៉ុង ២៧១ មេហ្គា ម៉ល ផងដែរ។

ស្ថិតក្នុងវ័យ ២៨ ឆ្នាំ ជាមួយបទពិសោធរកស៊ី លោកមានទស្សនៈចំពោះអាជីវកម្មរបស់ខ្លួនយ៉ាងដូច្នេះថា៖ «ដោយមិនគិតពីបញ្ហា ការរក្សាអាកប្បកិរិយាប្រកបដោយវិជ្ជាជីវៈចំពោះអតិថិជនរបស់យើង គឺជារឿងសំខាន់បំផុត។ យើង​មាន​គោល​បំណង​ដើម្បី​ដោះស្រាយគ្រប់​ស្ថានការណ៍លំបាក​ដែល​អាច​នឹង​កើតមាន​ឡើង។ យើងបើកចំហចំពោះគ្រប់ទម្រង់នៃការរិះគន់ និង មានវិធីសាស្រ្តជាប្រព័ន្ធក្នុងការស្វែងរកដំណោះស្រាយដ៏ល្អបំផុតដែលអាចធ្វើទៅបាន»៕

ប្រភព៖ Prestige