កាលពីថ្ងៃទី ៩ ខែមីនា ឆ្នាំ ២០២៥ កន្លងទៅនេះ អាជ្ញាធររបស់ថៃបានចុះទៅជួយសង្រ្គោះក្មេងអាយុ ៣ ខែម្នាក់ ដែលមានសារធាតុញៀននៅក្នុងខ្លួន ព្រោះតែបៅដោះម្តាយដែលជាអ្នកជក់គ្រឿងញៀន។
ករណីមួយនេះ បានកើតឡើងនៅក្នុងខេត្តបុរីរ៉ាំ ប្រទេសថៃ ដោយព័ត៌មានបានឱ្យដឹងថា មានប្តីប្រពន្ធមួយគូបានជក់ទាំងគ្រឿងញៀន កញ្ឆា និង បារីអគ្គិសនី ថែមទាំងមានកូនតូចអាយុ ៣ ខែនៅជាមួយទៀត។ ក្នុងនោះ អាជ្ញាធរបានបុកទៅចាប់ប្តីប្រពន្ធទាំងគូធ្វើតេស្តទឹកនោម ក៏បានឃើញថាពួកគេពិតជាមានសារធាតុញៀននៅក្នុងខ្លួនពិតមែន លើសពីនេះទៅទៀត សូម្បីតែកូនអាយុ ៣ ខែនោះក៏មានសារធាតុញៀននៅក្នុងខ្លួនដែរ។
យ៉ាងណាមិញ អាជ្ញាធរសន្និដ្ឋានថាក្មេងអាចទទួលសារធាតុញៀនពីទឹកដោះម្តាយ ទើបឈប់ឱ្យម្តាយបំបៅដោះទៀត និង ឱ្យបៅទឹកដោះគោផ្សេងសិន។ ដោយឡែក បុរសជាប្តីត្រូវបានអាជ្ញាធរបញ្ជូនទៅមណ្ឌលកែប្រែបំបាត់ថ្នាំញៀន រីម្តាយវិញត្រូវអាជ្ញាធរណែនាំឱ្យឈប់ជក់គ្រឿងញៀន និង ចុះមកត្រួតពិនិត្យជាប្រចាំថាសារធាតុញៀនអស់ពីក្នុងខ្លួនឬនៅ៕
ប្រភព៖ Kapook
