មហាជននិយមតាមដានវិស័យបវរកញ្ញា ច្បាស់ជានៅចាំនៅឡើយ អតីតម្ចាស់មកុដ Miss Grand Cambodia 2020 កញ្ញា សេង រដ្ឋា ក្រោយពីបានលាលែងពីតំណែង នាងនៅតែទទួលបានការគាំទ្រយ៉ាងខ្លាំងពីសំណាក់មហាជន។
កាលនោះ គេចាំបានថា ក្រោយពីលាលែងពីតំណែងបវរកញ្ញាខាងលើ កញ្ញា សេង រដ្ឋា ក៏ហាក់មមាញឹកក្នុងការងារសិល្បៈ រួមមានទាំងការបង្ហាញម៉ូដ និង ការសម្តែងផងដែរ ប៉ុន្តែក្រោយសាងកេរ្តិ៏ឈ្មោះមួយរយៈ ស្រីស្អាតរូបនេះក៏បានរយាលពីសិល្បៈ ដោយសំងំបញ្ចប់ការសិក្សាថ្នាក់បរិញ្ញាបត្រកាលពីអំឡុងឆ្នាំ ២០២២។
ដោយឡែក ក្រោយបញ្ចប់ថ្នាក់បរិញ្ញាបត្រហើយនោះ កាលពីអំឡុងឆ្នាំ ២០២៣ កញ្ញា សេង រដ្ឋា ក៏បានវិលត្រឡប់មកកាន់វិស័យភាពយន្តជាថ្មី ដោយបានចូលរួមសម្តែងរឿងភាគបុរាណ «បានស្នេហ៍អតីត» តែក្រោយការថតរួចរាល់ នាងក៏ហាក់ស្ងប់ស្ងាត់ជាថ្មី។
យ៉ាងណាមិញ ស្រាប់តែថ្មីៗនេះ គេបានឃើញវត្តមានរបស់ កញ្ញា សេង រដ្ឋា ជាថ្មី ក្នុងផេកសំអាងការមួយ ដោយនាងបានបង្ហាញនូវឈុតប្រពៃណីបុរាណយ៉ាងស្រស់សោភា។ ក្នុងនោះ អ្នកគាំទ្របានបង្ហាញការនឹករឭក និង សង្ឃឹមថា ក្រោយបង្ហាញមុខក្នុងការថតសំអាងការលើកនេះ សេង រដ្ឋា នឹងវិលត្រឡប់មកកាន់សិល្បៈជាថ្មីម្តងទៀត៕
