ទំនេរពេក កំលោះវ័យ ២៨ ឆ្នាំម្នាក់ប្រើឈ្មោះក្លែងក្លាយកក់សណ្ឋាគារចំនួន ៥៨០ បន្ទប់ រួចលុបចោលវិញ លទ្ធផលចុងក្រោយហួសការគិត

ថ្មីៗនេះ មានករណីឃាត់ខ្លួនបុរសជនជាតិជប៉ុនម្នាក់ បន្ទាប់ពីរូបគេបានបន្លំប្រើឈ្មោះក្លែងក្លាយដើរកក់បន្ទប់សណ្ឋាគារប្រមាណ ៥៨០ បន្ទប់ រួចក៏រំសាយចោល ធ្វើឱ្យខាងសណ្ឋាគារខាតលុយរាប់ម៉ឺនដុល្លារ។

តាមព័ត៌មានបានឱ្យដឹងថា បុរសនេះឈ្មោះ Sanuki Junki វ័យ ២៨ ឆ្នាំ ធ្លាប់បានធ្វើការជាអ្នកបច្ចេកទេសមន្ទីរពិសោធនៅមន្ទីរពេទ្យសាកលវិទ្យាល័យ Shimane។ តាមការស្រាវជ្រាវរបស់ប៉ូលិសបានឱ្យដឹងថា មានភស្តុតាងក្នុងទូរស័ព្ទរបស់ Sanuki ដែលបង្ហាញឱ្យឃើញថាគេដើរកក់បន្ទប់សណ្ឋាគារជាច្រើនកន្លែង សរុបចំនួន ៥៨០ បន្ទប់ឯណោះ។ ក្នុងនោះ កាលពីខែធ្នូ ឆ្នាំ ២០២៤ កន្លងទៅ ក្នុងរយៈពេលតែមួយថ្ងៃ គេបានកក់បន្ទប់ចំនួន ២៥៨ បន្ទប់ ក្នុងតម្លៃ ៤៩ ០០០ ដុល្លារ នៅសណ្ឋាគារមួយក្នុង Ota Ward ក្នុងទីក្រុងតូក្យូ ហើយក៏រំសាយចោលវិញដោយមិនប្រាប់ហេតុផល។​

Sanuki ត្រូវបានប៉ូលិសចាប់ខ្លួនកាលពីថ្ងៃទី ១៤ ខែកក្កដា ឆ្នាំ ២០២៥ កន្លងទៅ ក្រោមករណីធ្វើឱ្យមានការរាំងស្ទះការរកស៊ីរបស់សណ្ឋាគារ​។ ដោយឡែក មានព័ត៌មានបានឱ្យដឹងថា Sanuki ធ្លាប់ស្នាក់នៅក្នុងសណ្ឋាគារខាងលើ តែមានការមិនពេញចិត្តចំពោះបុគ្គលិកនៅទីនោះ ទើបសម្រេចចិត្តសងសឹកដោយវិធីនេះ។ យ៉ាងណាក៏ដោយ ប៉ូលិសកំពុងតែស៊ើបអង្កេតថាព័ត៌មានខាងលើអាចហេតុផលពិតប្រាកដ នៅពីក្រោយសកម្មភាពរបស់ Sanuki ឬទេ៕

ប្រភព៖ Khaosod