កាលពីពេលថ្មីៗនេះ អ្នកលេងបណ្តាញសង្គមហ្វេសប៊ុក មានការភ្ញាក់ផ្អើលយ៉ាងខ្លាំងក្រោយទទួលបានដំណឹងពីអតីតអ្នកនិពន្ធល្បី ឯកឧត្តម ខេរមៈ ភារុណ បងប្រុសបង្កើតឧកញ៉ា ខេមរៈ សិរីមន្ត ប្រាប់ពីមរណភាពរបស់តារាចម្រៀង បុកល្ហុង ហៅរហស្សនាម ព្រាប សុវត្ថិ បុកល្ហុង។
តាមរយៈដំណឹងពី ឯកឧត្តម ខេមរៈ ភារុណ បានជម្រាបតាំងពីថ្ងៃទី ០៣ ខែសីហា ឆ្នាំ ២០២៥ មកម្ល៉េះថា៖ «បាត់ និង បែកគ្នាមួយរយៈកាលធំ លោក បុកល្ហុង សូមដួងវិញ្ញាណក្ខន្ធលោកបានដល់ឋានសុគតិភព»។
គួររំឭកថា លោក បុកល្ហុង មានឈ្មោះពិតថា ស៊ីថា និង មានអាជីពក្រៅជាអ្នកលក់បុកល្ហុងនៅផ្សារអូរឫស្សី។ លោក គឺជាតារាចម្រៀងមានប្រជាប្រិយភាពមួយរូបក្នុងផលិតកម្ម U2 កាលពីជាង ១៥ ឆ្នាំ មុន ដោយចម្រៀងល្បីៗរបស់លោកមានដូចជាបទ «ត្រដាងដួងចិត្ត» បទ «ខ្ញុំស្រឡាញ់គេឬ?» និង បទ «កេរស្នេហ៍ទឹកនេត្រា» ជាដើម។ កាលនោះ ដោយការតុបតែងខ្លួនស្រដៀងនឹងឧកញ៉ា ព្រាប សុវត្ថិ ទើបអ្នកសិល្បៈ និង អ្នកគាំទ្របានហៅលោកថា ព្រាប សុវត្ថិ បុកល្ហុង៕
