ថ្មីៗនេះ បុរសជនជាតិចិនម្នាក់ បានទម្លាយបទពិសោធដ៏គួរឱ្យហួសចិត្តរបស់ខ្លួន ដែលជាពីជំងឺគ្រួសក្នុងតម្រងនោម ដោយសារតែការឡើងជិះរថភ្លើងហោះនៅសួនកម្សាន្ត។
បុរសរូបនេះបានរៀបរាប់ឱ្យដឹងថា ខ្លួនកំពុងកើតជំងឺគ្រួសក្នុងតម្រងនោម ហើយវាក៏ចាប់ផ្តើមធ្វើទុក្ខនៅពេលដែលខ្លួនទៅលេងប្រទេសជប៉ុន កាលពីថ្ងៃទី ១៣ ខែតុលា ឆ្នាំ ២០២៥ កន្លងទៅ ប៉ុន្តែដោយសារតែពេលនោះចំថ្ងៃឈប់សម្រាករបស់ជាតិ ទើបមិនមានមន្ទីរពេទ្យណាបើកទទួលព្យាបាលឡើយ រួចក៏សម្រេចចិត្តថាទៅដើរតាមគម្រោង គឺទៅលេងនៅសួនកម្សាន្ត Universal Studio ។ ក្នុងនោះ បុរសនេះក៏បានឡើងជិះ Roller Coaster ដែលជារថភ្លើងហោះល្បឿនលឿនចំនួន ៣ ជុំ។ ក្រោយពីពេលជិះហើយ បុរសនេះបានមកចូលបន្ទប់ទឹក ស្រាប់តែនោមចេញមកជាដុំគ្រួសតូចមួយ ហើយអាការធ្វើទុក្ខទាំងឡាយក៏បានបាត់ទៅវិញមួយរំពេច។
បុរសនេះបានរៀបរាប់បន្តថា ខ្លួនជាមនុស្សងាយកើតគ្រួសក្នុងតម្រងនោមណាស់ ហើយត្រូវគ្រូពេទ្យណែនាំឱ្យផឹកទឹកច្រើន និងហាត់ប្រាណជាប្រចាំ ដើម្បីជួយឱ្យគ្រួសចេញមកដោយខ្លួនឯង តែមិននឹកស្មានសោះថា ការមកជិះរថភ្លើងហោះតែមួយដង ស្រាប់តែជួយបណ្តេញគ្រួសបានយ៉ាងស្រួលដូច្នេះឡើយ៕
