មហាជននិយមតាមដានការងាររបស់តារាចម្រៀងរ៉េប វណ្ណដា ច្បាស់ជាបានជ្រាបហើយថា លោក វណ្ណដា ក៏ជាទូតឆន្ទៈរបស់ភេសជ្ជៈកូកា កូឡា អស់រយៈពេលប្រមាណ ២ ឆ្នាំកន្លះ មកហើយ។ យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាចម្រៀងរ៉េប វណ្ណដា ផ្ទុះការវែកញែកយ៉ាងខ្លាំង ខណៈផេកហ្វេសប៊ុកផ្លូវការក្រុមហ៊ុនខាងលើបានដករូបលោកចេញពី Cover ហ្វេសប៊ុក។
ការដករូបតារាចម្រៀងរ៉េប វណ្ណដា ពី Cover នេះដែរ បានធ្វើឱ្យប្រជាជនកម្ពុជាប្រតិកម្មយ៉ាងខ្លាំង ដោយម្នាក់ៗបានលើកឡើងនៃការពហិកាឈប់ញុំាភេសជ្ជៈខាងលើទៀតផង។
យ៉ាងណាមិញ ក្រោយផ្ទុះការវែកញែក និង កំពុងប្រតិកម្មពេញបណ្តាញសង្គមនានា សម្តេចតេជោ ហ៊ុន សែន បានចែករំលែកនូវសំណេរមួយរបស់លោក វ៉ាន់ សារាយ និង បានសរសេរខមមិនបន្ថែមថា៖ «
«សូមបងប្អូនជនរួមជាតិមេត្តារក្សាភាពស្ងប់ស្ងាត់សិន និងពិចារណាឱ្យបានដឹតដល់។ ដំបូងយើងត្រូវដឹងថា តើក្រុមហ៊ុនផ្តាច់កុងត្រាជាមួយ វណ្ណដា ដោយសារ វណ្ណដា ស្រឡាញ់ជាតិ ឬយ៉ាងណា? បន្ទាប់មក យើងត្រូវដឹងថាទោះជា កូកា ជាផលិតផលអាមេរិក តែវាក៏ជាផលិតផលរបស់ខ្មែរ ព្រោះផលិតនៅក្នុងកម្ពុជា ដែលកម្មករខ្មែរជាអ្នកធ្វើការ និង ទទួលផល។
ការបង់ពន្ធក៏បានមកកម្ពុជា ដែលជាការរួមចំណែកដល់កំណើនសេដ្ឋកិច្ចរបស់កម្ពុជា។ ប្រសិនក្រុមហ៊ុនដកខ្លួនចេញពីកម្ពុជានោះ កម្ពុជា គឺជាអ្នកខាតបង់ ដែលសត្រូវរបស់យើងជាអ្នកទទួលផល។ សត្រូវរបស់យើង ចង់វាយខាងសេដ្ឋកិច្ចយើងតាំងពីដំបូង ដូចជាគំរាមកាត់ផ្តាច់អគ្គិសនី ផ្តាច់អុីនធើណែត ឈប់លក់ប្រេង តែយើងបានម្ចាស់ការ កាត់ផ្តាច់ និង ឈប់ទិញជាមុន ដើម្បីកុំឱ្យគេគំរាមយើងបានទៀត។
ខ្ញុំមិនជំទាស់ទេ ប្រសិនបើ កូកា នេះ ផលិតនៅថៃ បងប្អូនអាចឈប់ប្រើបាន តែបើកូកានេះ ផលិតនៅកម្ពុជា បងប្អូនពហិកាមិនប្រើ កម្ពុជា គឺជាអ្នកខាតបង់ទាំងការងារទាំងប្រាក់ចំណូលដោយផ្ទាល់ និង ដោយប្រយោលរបស់ប្រជាជន និងចំណូលរដ្ឋ។ ក្រៅពីរឿងសេដ្ឋកិច្ច នៅមានរឿងសំខាន់មួយទៀត គឺគេរុញយើងឱ្យធ្វើជាសត្រូវជាមួយអាមេរិកតែម្តង ដែលរឿងនេះវាបង្កើតនូវបញ្ហាខាងការទូតសេដ្ឋកិច្ច ពាណិជ្ជកម្ម វិនិយោគរវាងកម្ពុជាជាមួយអាមេរិកតែម្តង។ សូមកុំចូលអន្ទាក់របស់សត្រូវយើងឱ្យសោះ។ សូម្បីតែក្រុមហ៊ុនថៃ ដែលកំពុងវិនិយោគនៅកម្ពុជាក៏យើងត្រូវខិតខំរក្សា ដើម្បីជាប្រយោជន៍របស់យើងដែរ»។
ជាងនេះទៅទៀត សម្តេចតេជោ ហ៊ុន សែន បានផ្ញើរពាក្យទៅកាន់ វណ្ណដា យ៉ាងមានន័យថា៖ «ពុកសង្ឃឹមថា វណ្ណដា នឹងយល់ទោះគេបញ្ឈប់កូនដោយមូលហេតុណាក៏ដោយ កូនគប្បីស៊ូទ្រាំ ដើម្បីប្រយោជន៍ជាតិ។ វណ្ណដា តំណាងឱ្យស្មារតីលះបង់ ដើម្បីប្រយោជន៍ជាតិ»៕
