លែងស្គាល់ផ្ទះគេផ្ទះឯង! ថៃលើកស្លាក ៣ ភាសា ចោទពលរដ្ឋខ្មែរនៅភូមិអូរបីជាន់ថាបានទន្ទ្រានដីថៃ ហើយព្រមានដាក់ទោសតាមច្បាប់ប្រទេសថៃទៀត

កាលពីថ្ងៃទី ៣ ខែកញ្ញា ឆ្នាំ ២០២៥ កន្លងទៅ អភិបាលខេត្តស្រះកែវ បានចេញលិខិតបញ្ជាឱ្យប្រជាជនខ្មែរ​ចំនួន ១៧០ គ្រួសារ រើទីលំនៅចេញពីភូមិអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបានអះអាងថាទីនោះជាទឹកដីតំបន់បានណងចាន់ និង បានណងយ៉ាកែវ ដែលជាទឹកដីរបស់ខ្លួន។

យ៉ាងណាមិញ ក្រោយពីអភិបាលខេត្តស្រះកែវចេញលិខិតរួច ក្រុមអាជ្ញាធរនៅក្នុងខេត្តស្រះកែវ បាននាំគ្នាមកតម្លើងស្លាកចំនួន ៦ ស្លាក នៅជិតកន្លែងដែលខ្លួនបានរាយបន្លាលួស នៅក្នុងបានណងចាន់ និង បានណងយ៉ាកែវ។ ស្លាកនោះមានការរៀបរាប់ជា ៣ ភាសា គឺខ្មែរ ថៃ និង អង់គ្លេស ដោយមានខ្លឹមសារថាប្រជាជនខ្មែរបានរុកទន្ទ្រានទឹកដីថៃយកទៅសង់ទីលំនៅ ដែលជាការរំលោភលើច្បាប់របស់ថៃ ហើយតម្រូវឱ្យអ្នកទាំងនោះនាំគ្នារើទីលំនៅចេញជាបន្ទាន់។

លើសពីនេះទៀត ភាគីថៃបានអះអាងថាប្រជាជនខ្មែរបានល្មើសនឹងច្បាប់ចំនួន ៣ ក្នុងប្រទេសរបស់ខ្លួនដែលមានដូចជាច្បាប់អន្តោប្រវេសន៍ មានទោសជាប់ពន្ធនាគារ ២ ឆ្នាំ ឬ ពិន័យ ២ ម៉ឺនបាត មួយទៀតគឺច្បាប់ព្រៃឈើ មានទោសជាប់ពន្ធនាគារចំនួន ៥ ឆ្នាំ ឬពិន័យជាប្រាក់ ៥​ ម៉ឺនបាត ឬត្រូវទាំងពីរ (ប្រសិនបើផ្ទៃដីលើសពី ២៥ រ៉ៃ) ចុងក្រោយគឺច្បាប់ព្រៃឈើអភិរក្សរបស់ជាតិ មានទោសជាប់ពន្ធនាគារចំនួន ១០ ឆ្នាំ ឬពិន័យជាប្រាក់ពី ២ ម៉ឺន ទៅ ២ សែនបាត (ប្រសិនបើផ្ទៃដីលើសពី ២៥ រ៉ៃ ការពិន័យគឺធ្ងន់ជាងនេះ)៕

ប្រភព៖ Khaosod