ប្រិយមិត្តភាគច្រើនបានស្គាល់រួចមកហើយ តារាចម្រៀងវ័យក្មេង ភឿន សុភាព គឺជាម្ចាស់ពានរង្វាន់កម្មវិធីប្រឡងចម្រៀងដ៏ធំ Cambodian idol Junior របស់ផលិតកម្មរស្មីហង្សមាស កាលពីអំឡុងចុងឆ្នាំ ២០១៩។
តាំងពីឡើងបង្ហាញសមត្ថភាពច្រៀងដំបូងក្នុងការប្រកួតកម្មវិធីខាងលើ ភឿន សុភាព ត្រូវបានមហាជន ក៏ដូចជាគណៈកម្មការបានស្គាល់ទេពកោសល្យ ទឹកដមសំឡេង និង លក្ខណៈសម្បត្តិរបស់ សុភាព រួចស្រេចទៅហើយ។ ក្រោយទទួលបានជ័យលាភី សុភាព ក៏ក្លាយជាតារាចម្រៀងអាជីព ដែលច្រើនឆ្នាំកន្លងមកនេះ សុភាព ក៏បានចេញបទចម្រៀងជារបស់ខ្លួនឯង ហើយក៏តែងបង្ហាញវត្តមាននៅតាមឆាកតន្រ្តី ក៏ដូចជាកម្មវិធីកម្សាន្តមួយចំនួនរបស់ស្ថានីយទូរទស្សន៍ហង្សមាសផងដែរ។
យ៉ាងណាមិញ មួយរយៈធំក្រោយមកនេះ ភឿន សុភាព កំពុងតែហ្វឹកហាត់សមត្ថភាពច្រៀងរបស់ខ្លួនបន្ថែមទៀត ដែលជាសិល្បៈចម្រៀងបែបបុរាណវិញម្ដង ហើយកំលោះសង្ហាពូកែសម្ដីរូបនេះ បានប្រជ្រៀតខ្លួនទៅក្រេបយកចំណេះដឹងនៅវង់ភ្លេងតន្រ្តីបុរាណត្រកូលខាត់ របស់តារាពហុជំនាញ ខាត់ សុឃីម។
នៅក្នុងវង់តន្រ្តីត្រកូលខាត់ ភឿន សុភាព កាន់តែរីកចម្រើន ព្រោះរូបគេមានទេពកោសល្យពីធម្មជាតិ មានសំឡេងពីរោះ មានការខិតខំប្រឹងប្រែង ព្រមទាំងបានគ្រូល្អៗជួយណែនាំ ជាពិសេសនោះ សុភាព ត្រូវបានអ្នកស្ថិតក្នុងវង់ភ្លេងបុរាណខ្មែរត្រកូលខាត់ សរសើរពីអត្តចរិតល្អប្រឹងប្រែងរៀនសូត្រ ចេះគោរពចាស់ទុំរបស់គេមិនដាច់ពីមាត់៕
