កាលពីថ្ងៃទី ២១ ខែកក្កដា ឆ្នាំ ២០២៥ កន្លងទៅនេះ នៅខេត្តប៉ាតានី ប្រទេសថៃ មានករណីលួចបង្កប់គ្រាប់បែកជាថ្មី ដោយម្តងនេះជាលួចដាក់នៅក្នុងទីលានតារាងបាល់ខណៈកំពុងមានការប្រកួត បង្កឱ្យអ្នកស័្មគ្រចិត្តរក្សាសន្តិសុខចំនួន ៤ នាក់បានរងរបួស។
តាមព័ត៌មានបានឱ្យដឹងថា ហេតុការណ៍បានកើតឡើងនៅម៉ោងប្រមាណ ៤ ល្ងាច នៅទីលានបាល់ទាត់ភូមិលេខ ៤ ឃុំណាំដាំ ស្រុកថងយ៉ាងដេង ខេត្តប៉ាតានី។ ដោយក្នុងនោះ មានពិធីប្រគល់រង្វាន់ក្នុងការប្រកួតកីឡារបស់រដ្ឋបាលឃុំណាំដាំ ដោយមានប្រជាជនក្នុងស្រុក ថ្នាក់ដឹកនាំមូលដ្ឋាន និងមន្រ្តីរដ្ឋាភិបាលជាច្រើនបានចូលរួម ស្រាប់តែនៅសុខៗក៏មានការលាន់ផ្ទុះយ៉ាងខ្លាំង បង្កឱ្យប្រជាជនរត់ផ្អើលភិតភ័យពេញទីលាន ហើយបង្កឱ្យមានអ្នកស័្មគ្រចិត្តរក្សាសន្តិសុខចំនួន ៤ នាក់ បានរងបួសស្រាល តែក៏ត្រូវបានគេបញ្ជូនទៅសង្រ្គោះរួចរាល់។
យ៉ាងណាមិញ ខាងអាជ្ញាធរបានរកឃើញគ្រាប់បែកទម្ងន់ប្រហែល ២ គីឡូក្រាមនៅជិតកន្លែងកើតហេតុ ហើយសន្និដ្ឋានថាមិនមែនជាគ្រាប់បែកប្រហារជីវិត តែជាគ្រាប់បែកបង្កឱ្យអសន្តិសុខ។ អាជ្ញាធរក៏បានរឹតបន្តឹងការពារសុវត្ថិភាព និង កំពុងស្រាវជ្រាវរកជនបង្កមកដាក់ទោសទៅតាមផ្លូវច្បាប់៕
ប្រភព៖ AMARINTV
