បើរំឭកពីតារាភាពយន្តល្បីៗខាងទឹកភ្នែក កាលពីអំឡុងឆ្នាំ ២០០០ ដល់ខ្ទង់ ២០១០ មហាជនអ្នកគាំទ្រជាច្រើនច្បាស់ជានឹកឃើញដល់តារាសម្តែងស្រីស្រស់សោភាមួយរូប គឺអ្នកនាង វ៉េត រតនា ជាមិនខាន។
កាលនោះ គេចាំបានថាអ្នកនាង វ៉េត រតនា គឺជាតារាសម្តែងស្រីមួយរូបមានប្រជាប្រិយភាព រួមជំនាន់ជាមួយអ្នកនាង ដាញ់ ម៉ូនីកា, អ្នកនាង កែវ ពេជ្រពិសី និង អ្នកនាង សឿ សុធារ៉ា ជាដើម ដោយស្ថិតក្នុងចំណោមតារាស្រីទាំងនេះ នាងគឺជាតារាទឹកភ្នែកម្នាក់តែងទទួលបានការចាប់អារម្មណ៍ និង ល្បីឈ្មោះណាស់។
អ្នកនាង វ៉េត រតនា ត្រូវបានចាត់ទុកជាតារាសម្តែងស្រីមានទេពកោសល្យ ជាពិសេសគឺជំនាញផ្នែកតួទឹកភ្នែកតែម្តង ដោយអ្នកនាងបានក្តោបតំណែងជាតួឯកក្នុងខ្សែភាពយន្ត និង បទចម្រៀងកាយវិការជាច្រើននៅអំឡុងឆ្នាំ ២០០០ ដល់ឆ្នាំ ២០០៧។
យ៉ាងណាមិញ ក្រោយសាងកេរ្តិ៍ឈ្មោះបានមួយរយៈធំ អ្នកនាង វ៉េត រតនា ក៏បានបញ្ចប់ភាពនៅលីវរៀបការអំឡុងឆ្នាំ ២០០៦ និង បានចាកចេញទៅរស់នៅឯសហរដ្ឋអាមេរិកជាមួយស្វាមីនៅអំឡុងឆ្នាំ ២០០៧។ បច្ចុប្បន្ន តារាសម្តែងស្រីរូបនេះកំពុងបើកអាជីវកម្មហាងលក់ទំនិញនៅសហរដ្ឋអាមេរិក និង មានកូនប្រុសស្រីចំនួន ២ រូប។
គួរជម្រាបថា អ្នកនាង វ៉េត រតនា ក្រោយពីចាកចេញទៅរស់នៅឯសហរដ្ឋអាមេរិកហើយនោះ អ្នកនាងក៏ឧស្សាហ៍មកលេងប្រទេសកម្ពុជាដែរ ដោយកាលពីឆ្នាំ ២០២៤ កន្លងទៅ អ្នកនាងមកលេងស្រុកកំណើតដល់ទៅ ២ ដងឯណោះ៕
