កាលពីថ្ងៃទី ១២ ខែតុលា ឆ្នាំ ២០២៥ កន្លងទៅនេះ នៅឯប្រទេសថៃ មានករណីបាក់រលំចេតិយព្រះធាតុចំណាស់មួយ ដែលបណ្តាលឱ្យខូចខាតខ្ទេចទាំងស្រុងតែម្តង។
តាមព័ត៌មានបានឱ្យដឹងថា ចេតិយមួយនេះឈ្មោះថាចេតិយណូនតាន មានអាយុ ៨៨ ឆ្នាំ មានកម្ពស់ ៤៣ ម៉ែត្រ ជាចេតិយដ៏ចំណាស់ទ្រុឌទ្រោមទៅហើយ ដែលស្ថិតនៅក្នុងវត្តព្រះធាតុណូនតាន ឃុំណូនតាន ស្រុកថាអ៊ុទេន ខេត្តណាក់ខនផានុម ហើយក៏ទើបនឹងចុះបញ្ជីនៅនាយកដ្ឋានវិចិត្រសិល្បរបស់ថៃហើយថ្មីៗនេះឯង។ លុះមកដល់ម៉ោងប្រមាណជា ៨ និង ៤៥ នាទីព្រឹក ថ្ងៃទី ១២ ខែតុលា ឆ្នាំ ២០២៥ កន្លងទៅ ចេតិយមួយនេះក៏បានរលំមកទាំងស្រុង មិនសល់រូបរាងសូម្បីបន្តិច ហើយវត្ថុបុរាណជាច្រើននៅក្នុងនោះ ដូចជាឆ័ត្រមាស ខ្សែកមាស និងរូបព្រះពុទ្ធបុរាណជាច្រើនអង្គ ក៏បានខូចខាតដូចគ្នា។
យ៉ាងណាមិញ មូលហេតុនៃការបាក់រលំ ត្រូវគេសន្និដ្ឋានថាអាចបណ្តាលមកពីទឹកភ្លៀងដែលដក់នៅតំបន់នោះ ហើយបានធ្វើឱ្យដីស្រុត ទើបចេតិយដែលទ្រុឌទ្រោមស្រាប់ទៅហើយក៏បានរលំមកតែម្តង។ គួរឱ្យដឹងដែរថា កាលពីថ្ងៃទី ៨ ខែតុលា ឆ្នាំ ២០២៥ កន្លងទៅ ខាងនាយកដ្ឋានវិចិត្រសិល្បរបស់ថៃទើបតែធ្វើការបួងសួង ដើម្បីត្រៀមធ្វើការជួសជុលចេតិយនេះ តែមិនទាន់បានជួសជុលផង ក៏ស្រាប់តែរលំបាក់ខ្ទេច ដែលធ្វើអ្នកស្រុកនាំគ្នាយំស្តាយមិនតិចឡើយ៕
ប្រភព៖ Khaosod
