ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស មិត្តភក្ដិទាំងក្នុង និង ក្រៅរង្វង់សិល្បៈ បាន និង កំពុងបង្ហាញការបារម្ភយ៉ាងខ្លាំងទៅកាន់ភរិយារបស់តារាចម្រៀងរ៉េប KingChi ខណៈលោក បានប្រកាសលក់ផ្ទះជាបន្ទាន់ ដើម្បីព្យាបាលជំងឺភរិយា។
បើតាមការឱ្យដឹងពីភរិយារបស់លោក KingChi គឺអ្នកនាង ម៉ាណូឡែន បានឱ្យដឹងថា អ្នកនាងខូចតម្រងនោម។ ដោយឡែក ក្រោយពីប្រកាសដំណឹងលក់ផ្ទះ ដើម្បីព្យាបាលជំងឺភរិយាហើយនោះ បើតាមព័ត៌មានលម្អិតបន្ថែមទៀត គឺអ្នកនាង ម៉ាណូឡែន មានជំងឺកាចសាហាវមួយ ដែលតម្រូវឱ្យប្តូរក្រលៀនចេញដើម្បីរក្សាជីវិតបន្ត។
ក្នុងនោះ ក្រោយពីទទួលដំណឹងខាងលើនេះហើយ មហាជនក៏បានចូលរួមជូនពរដល់ភរិយាលោក KingChi ឱ្យឆាប់ជាសះស្បើយពីជំងឺដ៏កាចសាហាវនេះផងដែរ។ មិនត្រឹមតែប៉ុណ្ណោះ គេក៏បានឃើញមានមិត្តរួមអាជីពជាច្រើន រួមមានអ្នកនាង ខាត់ សុឃីម, លោក វណ្ណដា, លោក All3rgy និង លោក NPN ព្រមទាំងមិត្តភក្តិជាច្រើនទៀត បានជូនថវិកាផ្ទាល់ខ្លួនដល់ KingChi និង ភរិយា ដើម្បីជួយសម្រាលបន្ទុកបានខ្លះ៕
